«Shalqar» radıosy onlaın rejımde kórsetile bastady
ASTANA. 15 aqpan. QazAqparat - «Shalqar» radıosynyń tarıhynda búgin úlken jańalyq boldy. Búginnen bastap halyqtyń súıikti radıosy beıne-onlaın rejımde (http://radioshalkar.kaztrk.kz/online_radio/cam/) kórsetile bastady»,- dep habarlaıdy «Qazaqstan» RTRK» AQ-nyń baspasóz hatshysy Tanakóz Tolqynqyzy.
2013 jyldyń 15 aqpanynda saǵat 11.20-da efırge shyqqan «Depýtat saǵaty» habarynyń búgingi qonaǵy QR Parlamenti Senatynyń depýtaty Svetlana Jalmaǵambetova boldy. Baǵdarlamanyń búgingi tarıhı sanyn jýrnalıst Gúlnur Omarhanqyzy júrgizdi. Depýtat kórermen kókeıinde júrgen suraqtarǵa jaýap berip qana qoımaı, óziniń súıikti aqyndarynyń óleńinen úzindi oqydy.
Aıta keterligi, zamanaýı tehnıkanyń qaryshtap damýy radıonyń tyńdarmany ǵana emes, kórermeni de bolatynyn kórsetip otyr. Tyńdarmandy radıo júrgizýshileriniń tikeleı efırdegi ózin-ózi ustaýy, qımyl-áreketi men kóńil-kúıi, jalpy radıonyń ishki kórinisi qandaı bolady eken degen oı jıi mazalaıtyny anyq. Biraq radıonyń ishki álemi únemi jumbaq kúıinde qalatyn. «Shalqar» radıosyna ornatylǵan veb-kameralar osy olqylyqtyń ornyn toltyryp, telearnamen úzeńgi túıistirýge múmkindik berdi.
Shalqar radıosy 1966 jyly 1 qańtardan bastap áýe tolqynyna shyqty. Alǵashynda aqparatty-sazdy bolyp ashylǵan bul arna keıinnen ár túrli janrlarmen (qazaqtyń ulttyq ádet-ǵuryptary, ádebı-mýzyka shyǵarmalardy nasıhattaý, taǵy basqa) óz baǵdarlamasyn keńeıtti. Birte-birte «Shalqar» radıosy respýblıka kóleminde ǵana emes, shet elderge de habar tarata bastady.
«Shalqar» radıosynyń basty maqsaty qazaq halqynyń ulttyq-rýhanı qundylyqtaryn jan-jaqty nasıhattaý. «Shalqar» radıosyn onlaın rejımde kórýge shaqyramyz.
http://radioshalkar.kaztrk.kz/online_radio/cam/
