«Shalqar» radıosy búkil formatyn qaıta qarap, túbirimen ózgertý qajet
ASTANA. 15 aqpan. QazAqparat - «Shalqar» radıosy búkil formatyn qaıta qarap, túbirimen ózgertý qajet. Búgin QR Parlamenti Májilisiniń jalpy otyrysynda depýtat Gúlnár Seıitmaǵanbetova osy máseleni kóterdi.
Depýtattyń aıtýynsha, 40 jyldan astam ýaqyt boıy tyńdarmandardyń súıiktisi bolǵan «Shalqar» radıosynyń búgingi bet-beınesi, formaty múlde ózgergen. Búgingi «Shalqar» burynǵy ulttyq qundylyqtarynyń barshasynan aırylǵan, ol úzdiksiz beriletin estradalyq ánder men arzan aıǵaı-shýdyń radıosyna aınalǵan.
«Shalqardyń» habarlaryn kezinde Qazaqstannan tys Reseı, Qytaı, Mońǵolııa, Ózbekstan, Qyrǵyzstan, Aýǵanstan, taǵy basqa da shet elderde turatyn qandastarymyz tyńdap kelgen edi. «Shalqar» ol kezde tek aqparat kózi ǵana emes, tyńdaǵan kezde týǵan jerge degen saǵynyshyn basatyn syrlasy, eldiń ańsaǵan kókiregin toltyratyn kúmbirlegen kúıler men qazaqy án-jyrdyń ordasy da edi. Munyń bári «Shalqarda» búginde joq, radıo úlken daǵdarysta», - deıdi G. Seıitmaǵanbetova.
Bul rette depýtat «Shalqar» ulttyq arnasy - memlekettik tilde ǵana habar taratatyn respýblıkadaǵy jalǵyz arna ekenin, endeshe qazaq radıosynyń baı arhıvindegi qazynany halyqqa usyný kerektigin alǵa tartady. «Tyńdaǵan halyq sýsyndap otyratyn qaıran Ǵarıfolla Qurmanǵalıevtiń ánderi efırden berilmegeli qansha ýaqyt ótti?! Jánibek Kármenov pen Roza Baǵlanovanyń daýystary umytylǵaly qashan?! Qazaqtyń kúmbirlegen kúıleri qaıda joǵalyp ketti? Asyldarymyzdyń daýysy men dombyranyń kúmbir únin ańsaǵan halqymyzǵa osy qazynalarymyzdy nege usynbaımyz? Olardyń ornyna búginde radıo efırinde kúndelikti kúıki tirlikteri men ishken-jegenin, arsyz kúlki men turpaıy mahabbattarynyń jaı-jasparlaryn jalpaq jurtqa jarııalaıtyn mánsiz tikeleı efır, taýsylmaıtyn týǵan kún meıramy, estradalyq áýen, sheti joq jarnama paıda bolypty», - deıdi G. Seıitmaǵanbetova.
Budan bólek, qazirgi tańda aqparat quraldaryna memleket tarapynan barlyq múmkinshilikter jasalǵanyn aıtqan depýtat, «Shalqar» radıosy búkil formatyn qaıta qarap, túbirimen ózgertý qajettigin alǵa tartady. «Otanshyldyq, patrıotızm, eldi, jerdi, táýelsizdikti qurmetteý sııaqty qasıetter urpaǵymyzdyń boıynda bolsyn desek, memlekettik arnalarda nasıhat tıimdi júrgizilýi kerek. Ol úshin bilikti mamandardan tıisti top quryp, memlekettik BAQ quraldarynyń, sonyń ishinde radıo men teledıdarlardyń berilý formatyn qarap, onyń mán-mazmunyn zerdeleý qajet», - deıdi ol.
