Shalqar kóliniń tabanyn tazartý jumysy merziminen buryn bitýi múmkin
NUR-SULTAN. QazAqparat - Aqtóbe oblysyndaǵy Shalqar kóliniń tabanyn tazartý jumystary jyl aıaǵyna deıin aıaqtalýy múmkin, dep habarlaıdy QazAqparat.
Bul týraly Aqtóbe oblysynyń ákimi Ońdasyn Orazalın ortalyq kommýnıkatsııalar qyzmetinde ótken baspasóz konferentsııasynda aıtty.
«Shalqar kóliniń problemasy – ońdy sheshimin tapqan másele. 2019 jyly Memleket basshysy Qasym-Jomart Kemeluly kelip, máseleni túbegeıli sheshý týraly tapsyrma bergen bolatyn. Osyǵan baılanysty Úkimet qoldaý kórsetip, byltyr jergilikti bıýdjet esebinen jobalaý-smetalyq jumystaryn ótkizgenbiz. Bıyldan bastap Úkimet tarapynan 3 mlrd teńgedeı qarajat bólinip, osy jumysqa kiristik. Kóldiń tabanyn tazartý, onyń sý aıdynyn qalpyna keltirý jobasy negizi eki jylǵa josparlanǵan. Biraq biz merdigerge usynys jasap edik, jyl aıaǵyna deıin jumysty bitirýge ýádesin alyp otyrmyz. Keler jyly kóktemde sý tasyǵan ýaqytta biraz sý jınap alamyz degen úmitimiz bar», - dedi oblys ákimi.
Aımaq basshysy óńirdegi basty ekologılyq problemalardń qala sheshilip jatqanyna toqtaldy.
«Ekologııa máselesi Aqtóbe óńirinde bir kúnde emes, biraz ýaqyttan beri qalyptastqan. Qaldyqtar saqtaıtyn polıgonǵa kelsek, 60 gektar kólemi bar, 25 jylǵa josparlanǵan polıgon bul. 2007 jyly salynǵan, jobalyq qýaty boıynsha 2032 jyly tolýy kerek edi. Biraq qalanyń ósýi sonshama qarqyndy bolǵandyqtan, qazirdiń ózinde tolyp ketti. Qazirgi tańda jekeshelendirý protsesterine baılanysty burynǵy kommýnaldyq mekemeler joq. Onyń ornyna máseleni túbegeıli sheshý úshin merdigerlerdiń aldyna talap qoıdyq. Onyń ústine ROP operatordyń kúshimen myńdaǵan qoqys jınaıtyn quraldar aldyryp jatyrmyz. Polıgonnyń qurylysy bıyl 1 qazanda aıaqtalady degen jospar bar. Jyl aıaǵyna deıin osy másele sheshiledi», - dedi Ońdasyn Orazalın.
Konferentsııa barysynda óńir basshysy aqtóbelikter qolqany qapqan jaǵymsyz ıisten qashan qutylatynyn aıtty.
«Iiske keletin bolsaq, kárizderdiń bári ábden tozǵan. Jobalaý jumysyn daıyndap bergenbiz. Ókinishke qaraı, qarjylandyrý máselesi tolyq sheshilmegen. Degenmen, hımııalyq qosyndylardyń, bakterııalardyń kúshimen sol ıisti azaıtý sharalaryn qoldanyp júrmiz. Bul másele áli de ózekti ekeni ras. Onyń ústine qalada úlken óndiris oryndary ornalasqandyqtan, olardyń tútini, basqa da aýaǵa shyǵaratyn qaldyqtary bar, sonyń zardabyn shegip kele jatyrmyz. Bul másele Ekologııa, geologııa jáne tabıǵı resýrstar mınıstrliginiń tikeleı baqylaýymen júrgizilip jatyr. Mınıstr Maǵzum Maratuly birneshe ret ózi kelip, sol mekeme basshylarymen kezdesip, jol kartasyna qol qoıyp, jumys bastalyp ketti. Jańa da aıttym, bul bir kúnde paıda bolǵan másele emes. Bul jerde altyvalentti hrom sııaqty tarıhı qaldyqtar da bar. Tehnologııanyń bárin jańa talaptarǵa sáıkestendirý kerek. Ol da - bir kúndik jumys emes. Kásiporyn 2-3 jyl ýaqyt surap otyr. Qazir jumys bastalǵan», - dedi oblys basshysy.
