Shalqar kólinde úsh adam qutqaryldy
ORAL. QazAqparat - Shalqar kólinde úsh adam qutqaryldy, dep habarlaıdy QazAqparat tilshisi.
BQO TJ departamentiniń órt sóndirý jáne avarııalyq qutqarý jumystary qyzmeti málim etkenindeı, oqıǵa 28 tamyz kúni Terekti aýdany Saryómir aýyly mańyndaǵy Shalqar kólinde boldy.
Saǵat 17.08-de jedel qutqarý jasaǵyna kólge demalýǵa kelgen úsh er adamnyń jaǵadan bes shaqyrymǵa uzap ketkeni jóninde habar túsken.
Anyqtalǵanyndaı, aldymen ekeýi qaıyqpen uzap ketken. Olardy qutqaram dep taǵy bir er adam qaıyqpen shyqqanymen, jete almaı, qatty tolqynnyń saldarynan sýǵa sekirgen. Onyń denesi qurysyp, sýda 20 mınýttaı turyp qalǵan.
Jedel qutqarý jasaǵy qyzmetkerleriniń tez is-qımyly nátıjesinde úsheýi de qutqarylyp, alǵashqy medıtsınalyq kómek kórsetildi.
Keıin olar jedel járdem qyzmetkerlerine tapsyryldy.
Úsh adamnyń jaqyndary qutqarýshylarǵa alǵysyn bildirdi.
