Shalqar kólin tazartýǵa 3 mlrd teńge qajet - senator
ASTANA. QazAqparat - QR Parlamenti Senatynyń depýtaty Marat Taǵymov Aqtóbe oblysyndaǵy Shalqar kólin saqtap qalýǵa respýblıkalyq deńgeıde kómek kerektigin málim etti, dep habarlaıdy QazAqparat tilshisi.
Osy oraıda senator Úkimet basshysy Baqytjan Saǵyntaevtyń atyna depýtattyq saýaldy joldady.
«Aqtóbe oblysy Shalqar aýdanynyń aýmaǵynda Aral ekologııalyq daǵdarysynan zardap shekken aımaqtyń aýa raıyna qolaıly áser tıgizetin erekshe sý aıdyny - Shalqar kóli ornalasqan. Qazirgi ýaqytta osy erekshe sý aıdyny apat aldynda turǵany ashyq máselege aınalyp otyr. Sý qurylystary men bógetter, sorǵy stansalary 1937 jyldan bastap 2012 jylǵa deıin birde-bir jańartý jumystary ótkizilmegendikten, apatty jaǵdaıda bolǵan. Saldarynan Shalqar kóli aıdynynyń 30 paıyzdan astam aýmaǵy sý ósimdikterimen jabylǵan, al kóldiń túbinde 1,5 metr tunba jınalǵan», - dep toqtaldy Taǵymov.
Onyń sózine qaraǵanda, sý qory buryn 25 mln tekshe metrdi qurasa, búgingi kúni 6-7 mln tekshe metrden aspaıtyn sý qalǵan. Tereńdigi buryn 15 metrge jetse, búginde 5 metrge deıin taıazdaǵan. 2010-2012 jyldar aralyǵynda Shalqar kóliniń gıdrotehnıkalyq qurylǵylaryn qaıta qurý jumystary júrgizilip, jergilikti bıýdjetten bólingen qarajat tolyq ıgerilgen. Alaıda jergilikti bıýdjettiń múmkindigi jetkilikti bolmaǵandyqtan, tehnıkalyq-ekonomıkalyq negizdemeniń keıbir talaptaryn respýblıkalyq bıýdjet esebinen qarjylandyrý týraly usynystar birneshe ret salalyq mınıstrlikke joldanǵan.
«2017 jyly jańadan tehnıkalyq-ekonomıkalyq negizdemeniń ázirlenýine oblystyq bıýdjetten 30,5 mln teńge kóleminde qarjy bólingen. Qazirgi tańda jobaǵa tıisti memlekettik saraptama jasalýda. Jobanyń aldyn ala quny 3 mlrd 149,9 mln teńgeni quraıdy. Atalǵan sý aıdyny barlyq Aral aımaǵy úshin qanshalyqty mańyzdy ekenin eskere otyryp, Shalqar kóliniń túbin tazartý jobasyn ary qaraı júzege asyrý maqsatynda respýblıkalyq deńgeıde yqpal etýińizdi ótinemiz», - dedi senator.
