Shalqar-Imantaýdaǵy 46 demalys ornynyń 13-i jańǵyrtýdy qajet etedi
PETROPAVL. KAZINFORM – Soltústik Qazaqstan oblysy Shalqar men Imantaý kólderiniń jaǵalaýynda ornalasqan demalys nysandaryna júrgizilgen monıtorıng nátıjesinde birqatar kemshilik anyqtaldy.
Aıyrtaý aýdanynda ornalasqan týrıstik nysandardyń jaı-kúıi qaıta tekserilip, olardy damytýǵa arnalǵan 2026–2027 jyldarǵa arnalǵan jol kartasy ázirlendi.
- Mamyr aıynda aýdan ákimdigi, kásipkerlik jáne ındýstrııalyq-ınnovatsııalyq damý basqarmasy men jaýapty mekemeler Shalqar jáne Imantaý kólderiniń jaǵalaýyndaǵy demalys oryndaryn aralap, olardyń qazirgi jaǵdaıyna monıtorıng júrgizdi.
Tekserý barysynda aýmaqtardy abattandyrý, sanıtarlyq jaǵdaıdy saqtaý jáne týrısterdiń qaýipsizdigin qamtamasyz etý boıynsha birqatar kemshilikter anyqtaldy. Keıbir nysandarda qutqarý beketteri, medıtsınalyq pýnktter, baılanys quraldary men baqylaý munaralary bolmaǵan. Menshik ıeleri men jalǵa alýshylarǵa tıisti usynymdar berilip, qazirgi ýaqytta anyqtalǵan zań buzýshylyqtar joıyldy, - deıdi Aıyrtaý aýdanynyń ákimi Meıram Meńdibaev.
Aýdan ákimi Imantaý-Shalqardaǵy 46 týrıstik nysannyń 13-i qazirgi zamanǵy demalys talaptaryna tolyq sáıkes kelmeıtinin aıtty. Bul oryndarda Turǵyn úılerdi jańartý, sanıtarlyq-gıgıenalyq toraptardy jaqsartý, jaǵajaılardy abattandyrý jáne materıaldyq-tehnıkalyq bazany kúsheıtý qajet.
- Jol kartasyna sáıkes, «Arman», «Bastaý», «Gornıak», «Arlan», «Súıin», «Ardager», «Sabına», «Aq bulaq», «Shalqar», «Qarlyǵash», «Arshaly» jáne basqa da demalys oryndarynda jóndeý jáne jańǵyrtý jumystary júrgiziledi. Keıbir nysandarda eski úıler tolyqtaı jańasyna aýystyrylsa, birqatar demalys oryndarynda balalar jáne sport alańdary salynyp, jańa sanıtarlyq-gıgıenalyq toraptar ornatylady.
Bıyl týrıstik ınfraqurylymdy jańǵyrtý boıynsha 14 ınvestıtsııalyq joba iske asyrylady, - deıdi Meıram Meńdibaev.
Josparǵa sáıkes, «Imantaý», «Qazyǵurt», «Dom ý ozera», «Izýmrýdnoe», «Aytas», «Jemchýjına», «Ajar», «Aqbar» jáne «Skazka» demalys aımaqtary keńeıtiledi. Munda jańa kottedjder, jatyn korpýstar men qonaq úıler salý kózdelgen. Jalpy alǵanda, bıyl aýdannyń týrıstik ınfraqurylymyn damytýǵa 2,1 mlrd teńge ınvestıtsııa tartý josparlanyp otyr.
Buǵan deıin Imantaý-Shalqar týrızm aımaǵyna suranys artyp kele jatqanyn jazǵan edik.
