Shalqar Baıbekov Abaı oblysy máslıhatynyń tóraǵasy bolyp saılandy

SEMEI. KAZINFORM – Abaı oblystyq máslıhatynyń jańa tóraǵasy bolyp Shalqar Baıbekov saılandy. Ol buǵan deıin oblys ákiminiń birinshi orynbasary qyzmetin atqarǵan. 

Abaı oblysy máslıhatynyń kezekten tys jıyrma úshinshi sessııasy ótti. Sessııa barysynda máslıhat depýtattarynyń sheshimi boıynsha jańa tóraǵa bolyp Shalqar Baıbekov saılandy. 

Oblys máslıhatynyń burynǵy tóraǵasy Qýanysh Súleımenovtiń ókilettiligi merziminen buryn toqtatyldy. Belsendi qyzmeti úshin oǵan Qazaqstan Respýblıkasy Parlamenti Senaty tóraǵasy atynan Qurmet gramotasyn tapsyryldy. 

Shalqar Zamanbekuly 1967 jyly Semeı oblysy Abaı aýdanynda dúnıege kelgen. 1996 jyly Qazaqstan memlekettik basqarý Akademııasyn «Ekonomıst» mamandyǵyn, keıin Qazaqstan memlekettik zań Akademııasynyń «Zańger» mamandyǵyn támamdaǵan.

Eńbek jolyn 1988 jyly Semeı oblysy Jańasemeı aýdandyq Memlekettik saqtandyrý ınspektsııasynyń aǵa ınspektory bolyp bastady. 

1988-1999 jyldary Semeı qalasy jáne Semeı oblysynyń salyq ınspektsııasynyń bas memlekettik ınspektory, bólim bastyǵy, Salyq ınspektsııasynyń birinshi orynbasary qyzmetterin atqardy.

1999-2014 jyldary Pavlodar qalasy boıynsha Salyq komıtetiniń tóraǵasy, Astana qalasy boıynsha Salyq komıteti tóraǵasynyń orynbasary, Astana qalasy Almaty aýdany boıynsha, Qaraǵandy oblysy boıynsha, Astana qalasy Esil aýdany boıynsha Salyq komıtetteriniń tóraǵasy qyzmetinde boldy.

2014-2017 jyldary Qazaqstan Respýblıkasy Prezıdenti Ákimshiliginiń memlekettik baqylaý jáne aýmaqtyq-uıymdastyrý jumysy bóliminiń memlekettik ınspektory boldy.

2017-2019 jyldary Shyǵys Qazaqstan oblysy ákiminiń orynbasary, 2019-2021 jyldary Shyǵys Qazaqstan oblysy Besqaraǵaı aýdanynyń ákimi bolyp qyzmet atqardy.

2022-2023 jyldary Abaı oblysy ákiminiń orynbasary boldy. Al 2023 jyldyń qazan aıynan osy ýaqytqa deıin oblys ákiminiń birinshi orynbasary qyzmetin atqarǵan. 

Eske salsaq, osyǵan deıin Abaı oblysynda aqyn Shákárim Qudaıberdiulyna eskertkish qoıylǵany habarlanǵan.