Shalǵaıdaǵy kásipkerler úshin qyzmet kórsetý aımaqtary qurylady

ASTANA. QazAqparat - Internet jelisine qol jetkizý múmkindikteri shamaly kásipkerler úshin aldaǵy jyldary «óz-ózine qyzmet kórsetý aımaqtary» qurylady. Ol aımaqtar arqyly kásipkerler konsýltanttardyń kómegimen memlekettiń elektrondy qyzmetterin jáne memlekettik qoldaý sharalaryn ala alady, dep habarlaıdy QazAqparat tilshisi.

Úkimet otyrysyna shaǵyn jáne orta bıznesti tsıfrlandyrý týraly baıandama jasaǵan QR Ulttyq ekonomıka mınıstri Tımýr Súleımenov birshama usynysty alǵa tartty. Onyń aıtýynsha, Biryńǵaı kásipkerlikti qoldaý jáne kásipkerlikti damytý «Bıznestiń jol kartasy-2020» baǵdarlamasy aıasynda qalalar men aýdan ortalyqtarynda qurylǵan barlyq servıstik ortalyqtardyń jumysyn tsıfrlandyrý kerek.

«Qalalardaǵy 25 Kásipkerlerlikti qoldaý ortalyǵynda jáne aýdan ortalyqtary men monoqalalardaǵy 189 kásipkerlikti qoldaý ortalyqtarynda ınternet jelisine qol jetkizý múmkindikteri shamaly kásipkerler úshin «óz-ózine qyzmet kórsetý aımaqtary» qurylady.  Ol aımaqtar arqyly kásipkerler konsýltanttardyń kómegimen memlekettiń elektrondy qyzmetterin jáne memlekettik qoldaý sharalaryn ala alady», - deıdi Tımýr Súleımenov.

Mınıstrdiń sózine sensek, aýyldy jerlerde is-sharalardy júzege asyratyn kásipkerlerdiń biliktiligin arttyrý úshin bıyldan bastap tsıfrlyq saýattylyqty arttyrý boıynsha oqytý baǵdarlamasy bastalǵan. Ol boıynsha jyl saıyn 15 myńnan astam kásipker bilim alady.

«Osy jyldyń ekinshi jartysynan bastap Ulttyq kásipkerlik palatasy pılottyq rejimde Astana jáne Almaty qalalarynda Kásipkerlerge qyzmet kórsetý ortalyǵynyń jumysyn elektrondyq formatqa tolyǵymen aýystyrýdy josparlap otyr. Avtomattandyrý bıznesti qarjylaı emes qoldaý kórsetýdiń bıýdjetin qysqartýǵa, qamtý aımaǵyn keńeıtýge, qujat aınalymyn qysqartýǵa jáne keńesshilerdiń sanyn ońtaılandyrýǵa múmkindik beredi», - deıdi ol.