Shalǵaıdaǵy garnızonnyń 700-den asa áskerı qyzmetshisi medıtsınalyq tekserýden ótip jatyr

ASTANA. QazAqparat – Qorǵanys mınıstriniń tapsyrmasy boıynsha áskerı dárigerlerdiń birikken jasaǵy jeke quramǵa medıtsınalyq jáne psıhologııalyq kómek kórsetýge baǵyttalǵan sharalardy iske asyryp jatyr, dep habarlaıdy QazAqparat vedomstvonyń baspasóz qyzmetine silteme jasap.

Jarkent garnızonynda jumys istep jatqan birikken jasaq Taldyqorǵan, Almaty, Semeı, Aıagóz áskerı gospıtaldarynyń jáne Qazaqstan-Reseı medıtsınalyq ýnıversıtetiniń beıindi mamandaryn bir jerge jınady.

Atalǵan sharalar Taldyqorǵan qalasy Áskerı gospıtaliniń jyljymaly dalalyq kesheninde ótkizilip jatyr. Onda zerthanalyq, rentgendik, ýltradybystyq jáne endoskopııalyq zertteýlerdiń keń spektrin júrgizýge arnalǵan klınıkalyq jáne dıagnostıkalyq modýlder bar. Zamanaýı jabdyqtar baıqalmaıtyn aýrýlardy anyqtaýǵa jáne ýaqtyly tıimdi medıtsınalyq kómek kórsetýge múmkindik beredi.

Bul birikken jasaq quramynda barlyq sanattaǵy áskerı qyzmetshilerge jáne olardyń otbasy múshelerine kásibı psıhologııalyq kómek kórsetetin maman-psıholog jumys isteıdi. Áskerı ortaǵa beıimdelýde qıyndyqtary bar merzimdi qyzmettegi sarbazdarǵa da erekshe nazar aýdarylady. Psıholog jeke, toptyq jumys ádisterin qoldanyp, áskerı ujymdy biriktirýge jáne kommýnıkatıvtik daǵdylardy arttyrýǵa baǵyttalǵan damytý jáne túzetý sabaqtaryn júrgizedi.

Medıtsınalyq tekserý shamamen 700-ge jýyq adamdy qamtydy. Áskerı qyzmetshiler qyzmettik mindetterin oryndaýdan qol úzbeı qajetti mamandandyrylǵan medıtsınalyq kómek alady.