Shalǵaıdaǵy eldi mekenderdi munaı ónimimen turaqty qamtamasyz etýdi qarastyratyn zań qabyldandy

ASTANA. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine munaı ónimderiniń jekelegen túrlerin óndirý men aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylanyp, qabyldandy.

Parlament qabyldaǵan zań Qazaqstannyń munaı ónimderiniń jekelegen túrlerin óndirý jáne olardyń aınalymy salasyndaǵy qoldanystaǵy zańnamany jetildirý men quqyq qoldaný praktıkasynda anyqtalǵan quqyqtyq olqylyqtardy joıýdy kózdeıdi. Budan bólek, munaı jetkizýshileriniń munaı óńdeý zaýyty aýmaǵynda aýmaǵynda rezervýarlardan vagon-tsısternalarǵa quıý arqyly munaı ónimderin ótkizýdi júzege asyrý quqyǵy bekitiledi. «Atalǵan shara Memleket basshysynyń bızneske qatysty ákimshilik kedergilerdi azaıtý jónindegi tapsyrmalaryn iske asyrýdy jáne shalǵaıdaǵy aýdandar men eldi mekenderdi munaı ónimderimen turaqty jabdyqtaýdy qamtamasyz etýge múmkindik beredi», - deıdi senator Mıhaıl Bortnık.

Onyń aıtýynsha, ekinshi oqylymǵa ázirleý barysynda usynylǵan túzetýler munaı óńdeý zaýyttarynda jáne munaı bazalarynda esepteý jáne baqylaý qurylǵylaryn engizý merzimin aýystyrýdy kózdep otyr. Qoldanystaǵy zańǵa sáıkes, bul qurylǵylardy engizý 2016 jyldyń qańtarynan dep kórsetilgen bolatyn. Osyǵan baılanysty, atalmysh merzim munaı bazalary úshin 2018 jyldyń 1 qańtaryna, al munaı óńdeý zaýyttary úshin 2017 jyldyń 1 qańtaryna belgilenip otyr.