Shalǵaıdaǵy eldi mekenderdi munaı ónimderimen turaqty qamtamasyz etý qarastyrylýda - Senat

ASTANA. QazAqparat - Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine munaı ónimderiniń jekelegen túrlerin óndirýdi jáne olardyń aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Qujatqa Parlamenttiń bir top depýtattary bastamashylyq jasaǵan.

Zań jobasy Qazaqstannyń munaı ónimderiniń jekelegen túrlerin óndirý jáne olardyń aınalymy salasyndaǵy qoldanystaǵy zańnamany jetildirý men quqyq qoldaný praktıkasynda anyqtalǵan quqyqtyq olqylyqtardy joıýdy kózdeıdi. Budan bólek, munaı jetkizýshileriniń munaı óńdeý zaýyty aýmaǵynda aýmaǵynda rezervýarlardan vagon-tsısternalarǵa quıý arqyly munaı ónimderin ótkizýdi júzege asyrý quqyǵy bekitiledi. «Atalǵan shara Memleket basshysynyń bızneske qatysty ákimshilik kedergilerdi azaıtý jónindegi tapsyrmalaryn iske asyrýdy jáne shalǵaıdaǵy aýdandar men eldi mekenderdi munaı ónimderimen turaqty jabdyqtaýdy qamtamasyz etýge múmkindik beredi", - deıdi zań jobasy boıynsha baıandaǵan senator Mıhaıl Bortnık.

Budan bólek, munaı jetkizýshilerdiń buryn basqa tulǵa ımporttaǵan shıki munaıdy óńdeý úshin munaı ónimderin óndirýshige jetkizý quqyǵy beriledi. Bul elimizdiń munaı óńdeý zaýyttaryn shıki munaımen jáne gaz kondensatymen toltyrýdy qamtamasyz etýge múmkindik týǵyzady.

Sonymen qatar, munaı jetkizýshilerge Reseıdiń munaı óndirý uıymdarynan ǵana emes, olardyń dılerlerinen de shıki munaıdy jáne gaz kondensatyn satyp alýǵa múmkindik beriletin bolady. Osyǵan baılanysty, zań jobasy arqyly Reseıdiń munaıyn jáne gazyn Qazaqstan aýmaǵyna Eýrazııalyq ekonomıkalyq odaqqa múshe basqa da memleket aýmaǵynan ákelýdi retteý usynylady.