Shalǵaıdaǵy aýyl turǵyndaryna 66 memlekettik qyzmet poshta arqyly kórsetiledi
«Ázirshe 66 memlekettik qyzmet kórsetiledi, onyń ishinde elektrondyq anyqtamalardy berý, balanyń týylýyn tirkeý, balanyń týylýy men kútimine baılanysty járdemaqy taǵaıyndaý, jyljymaıtyn múlik obektilerine tehnıkalyq pasporttyń telnusqasyn berý, zapastaǵy ofıtserlerge áskerı bıletter jáne olardyń telnusqalaryn (áskerı bılettiń ornyna ýaqytsha kýálikter) berý jáne taǵy da basqa qyzmetter bar», dep habarlaıdy «Azamattarǵa arnalǵan úkimet» korporatsııasynyń baspasóz qyzmeti.
«Azamattar arnalǵan úkimet» memlekettik korporatsııasynyń tóraǵasy Abylaıhan Ospanovtyń aıtýynsha, memlekettik korporatsııada shalǵaıdaǵy aýyldyq okrýg turǵyndarynyń memlekettik qyzmetterdi erkin alýyna erekshe nazar aýdarylyp keledi. Osylaısha, 2012 jyldan bastap búkil Qazaqstan boıynsha 70 mobıldik HQKO jumys isteıdi, olar ákimdikterdiń ótinimderi boıynsha eldi mekenderge shyǵyp, qyzmet kórsetedi. Jyl basynan beri olar 7 455 ret aýyl turǵyndaryna baryp, 335 736 qyzmet kórsetken.
Qazposhta bólimsheleri arqyly tanymal memlekettik qyzmetterdi kórsetýdiń pılottyq jobasy - azamattarǵa ýaqyt pen qarajatty únemdeýge múmkindik beretin yńǵaılylyqqa arnalǵan taǵy bir qadam. Pılottyq joba aldymen Shyǵys Qazaqstan oblysynda eki aı boıy testileýden ótti, nátıjesinde ony Qazaqstannyń barlyq aýmaǵynda qoldaný týraly sheshim qabyldandy. «Pılottyq jobany testileýde ShQO pochta baılanysy bólimshelerinde 233 qujat berilgen. Odan bólek, bizdiń jumysymyzǵa turǵyndar tarapynan jaqsy pikirler aıtylyp, oń baǵalar berilgendikten, biz ony elimizdiń barlyq aýmaǵynda júrgizýdi sheshtik. Qazirgi tańda shalǵaı eldi mekenderdiń turǵyndary pochta baılanysy bólimsheleri arqyly 1656 korporatsııa qyzmetin ala alady. Demek, endi bul qyzmetterdi alý úshin, olar aýdan ortalyqtaryna baryp áýre bolmaıtyn boldy», - dedi A.Ospanov.
«Biz aýyl turǵyndaryn tek poshta qyzmetimen emes, sonymen qatar ár túrli bank qyzmetterimen, árıne, onyń ishinde HQKO qyzmetimen de qamtamasyz etetin bolamyz. Óıtkeni aýylda kóbine poshta baılanysy bólimsheleri ǵana jumys isteıdi. Memlekettik kórsetiletin qyzmetterdi poshta arqyly alý úshin, aýyl turǵyndary qujattar paketin usynýlary, qyzmet kórsetýge jazbasha túrde ótinish berýleri jáne qajet bolǵan jaǵdaıda, memlekettik baj salyǵyn tóleýleri tıis. Qazposhta operatory ótinishterdi qabyldap, qujattar paketin qalyptastyrady jáne ony jaqyn jerdegi halyqqa qyzmet kórsetý ortalyǵyna jóneltedi. Onda HQKO ınspektory qyzmetti resimdep, kýrer arqyly daıyn qujattardy jiberedi», - dep qosty «Qazposhta» basshysy Sáken Sársenov.
