Shalǵaıdaǵy aýyl mektebin jóndeý jumysy Májilis depýtattarynyń nazarynda

NUR-SULTAN. QazAqparat - Májilis depýtattary, «Nur Otan» partııasy fraktsııasynyń músheleri Baqytbek Smaǵul jáne Ǵalym Ámireev Qyzylorda oblysynyń Jalaǵash aýdany Tań aýyldyq okrýginde kúrdeli jóndeý jumysy júrgizilip jatqan №118 orta mektep ǵımaratynyń qurylysymen tanysty.

Aýyldaǵy bilim ordasynyń irgetasy 1982 jyly qalanǵan.

Sodan bergi 40 jylǵa jýyq ýaqytta mektep ishinde kishigirim jóndeý jumystary júrgizilgenimen, dál osyndaı kúrdeli jumys alǵash ret jasalyp otyr.

Jóndeý jumystaryna respýblıkalyq bıýdjetten 279 mln. teńge bólingen.

Merdiger mekeme ókili Erkebulan Syzdyqbaevtyń aıtýynsha, jumys mamyr aıynda bastalyp, qazirgi ýaqytta montajdaý jumystarynyń 60 paıyzy aıaqtalǵan.

Sondaı-aq, tereze ornatylyp, ishki jumystar jasalyp, mekteptiń syrtqy beti qaptalǵanyn, nysand 1 qyrkúıekke deıin tapsyratynyn jetkizdi.

Jetekshi partııa aýyldaǵy bilim oshaqtaryn da nazardan tys qaldyrmaı, shalǵaıdaǵy aýyl mektebine jasalyp jatqan jumystar onyń kórinisi ekenin aıtqan fraktsııa múshesi Ǵalym Ámireev endigi jerde osy bólingen qarajattyń tıimdi jumsalýy kerektigine erekshe nazar aýdardy.

Sapar barysynda depýtattar mektep aınalysynyń qorshaýy jóndeý jumystaryna engizilmegendikten jergilikti ákimdik arqyly aldaǵy ýaqytta osynyń sheshý joldaryn qarastyrýdy usynǵandaryn aıtty.

Májilis depýtaty Baqytbek Smaǵul saılaýaldy baǵdarlama 2025 jylǵa deıin oblystyń barlyq mektepterin hımııa, bıologııa, fızıka pánderi kabınetterimen kezeń-kezeńimen jaraqtandyrý, mekteptegi jóndeý jumystary balalardyń bilim alýyna da ózindik septigin tıgizetindigine senim bildirdi.

Jalpy halyq qalaýlylary aýdandaǵy sapary barysynda partııa baǵdaralamasy aıasynda jeke kásipkerdiń qoldaýymen paıdalanýǵa berilgen jabyq basseın jáne medıtsınalyq klınıka jumysyn kórip, aýdan turǵyndarymen kezdesti.

Sonymen qatar, depýtattar Syr eline sapar barysynda kóptegen áleýmettik mańyzy bar máselelerdi kóterip, turǵyndardyń talap-tilekterin nazarlaryna alýda.