Shalǵaıdaǵy eldi-meken muǵalimderi úshin «aýyldyq koeffıtsıentti» engizýdi suraımyz – depýtat
ASTANA. KAZINFORM – Májilis depýtaty Qaraqat Ábden Qazaqstan Respýblıkasy Premer-Mınıstriniń orynbasary Tamara Dúısenovaǵa depýtattyq saýal joldady.
«Búginde qoldanystaǵy zańnamaǵa sáıkes aýyl muǵalimderiniń jalaqysy men tarıftik stavkalary qalalyq muǵalimderdiń stavkalarymen salystyrǵanda jıyrma bes paıyzǵa kóterildi. Atalǵan zańnyń arqasynda aýyl muǵaliminiń jaǵdaıy túzeldi, tipti, aýyldaǵy ustazdardyń qalaǵa kóshkisi joq. Bul aýyldaǵy oqýshylarǵa qala mektepterimen teń dárejede bilim berý úshin qabyldanǵan durys sheshim bolatyn. Biraq, ókinishke qaraı, osy zańda nazardan tys qalǵan bir másele bar.
Ol turǵylyqty halyq sany ortasha aýyldan az bolsa da, mártebesi «qala» nemese «kent» statýsyna ıe bolǵan eldi-meken muǵalimderiniń jaǵdaıy. Barlyq krıterıı jaǵynan aýyldyq eldi-mekenderge jatatyn kentter men shaǵyn qalalardaǵy muǵalimder zańda belgilengen 25 paıyzdyq qosymsha tólem – «aýyldyq koefıtsıentke» qol jetkize almaı otyr.
ıAǵnı, olar turatyn eldi-mekenniń ákimshilik mártebesi qaǵaz júzinde «qala» nemese «kent» bolǵanymen, is júzinde, ol qala da, kent te emes, kádimgi aýyl!
Mysaly, Ulytaý oblysy Qarajal qalasy turǵyndarynyń sany 8 myń adam, al, Jáırem kentinde 9 myń halyq turady. Osy eldi-mekenderden 20 shaqyrym jerdegi «Jeńis» aýylynyń muǵalimderi «aýyldyq koeffıtsıentti» alady. Al, oblys ortalyǵy Jezqazǵannan 220 shaqyrym, Qaraǵandydan 500 shaqyrym qashyqta ornalasqan Qarajal men Jaırem kentiniń muǵalimderi atalǵan ústemaqylardan, tıisti áleýmettik kómekten, qalalyq emhanalarǵa qaralý sekildi taǵy da basqa múmkindikterden aıyrylǵan. Sol sebepti de, máselen, Jáırem kentiniń muǵalimderi kórshiles aýyldarǵa jumys aýystyrady eken», - dedi Qaraqat Ábden.
Ol osy jaǵdaıǵa baılanasty «Aýyl» partııasynyń elimizdegi 10 000 adamǵa jetpeıtin kentter men aýdandyq mańyzy bar shaǵyn qalalar boıynsha máseleni muqııat zerttegenin tilge tıek etti.
«Ulttyq statıstıka bıýrosynyń málimetteri boıynsha, elimizde halyq sany 10 000 adamǵa jetpeıtin 36 eldi meken – kentter men shaǵyn qalalar esepke alynǵan. Ol jerde 70 ten astam jalpy bilim beretin memlekettik mektep bar. Óńirlerdegi osyndaı kentter men qalalardyń muǵalimderin qoldaý qajet dep esepteımiz! ıAǵnı, shalǵaıdaǵy mektepterdiń barlyq belgisi bar, kontseptsııaǵa tolyqtaı sáıkes keletin eldi-meken muǵalimderine aýyldyq koeffıtsıent qoljetimdi bolý tıis. Bul usynys oń sheshimin tapsa, kishkentaı «kent», «qala» mártebesi bar eldi-mekenderdiń áleýmettik-ekonomıkalyq damýyna oń áser etetini sózsiz. Sol sebepti, qurmetti Tamara Bosymbekqyzy, ákimshilik mártebesi «qala» ne «kent» bolǵanyna qaramastan, kádimgi aýyl tirligin keship otyrǵan shalǵaıdaǵy eldi-meken muǵalimderi úshin «aýyldyq koeffıtsıentti» engizýdi suraımyz», - dedi Májilis depýtaty.
