Shekara mańyndaǵy aýdandardyń turǵyndary úshin eńbek ótilin esepteýdiń erekshe normalary engizilmek
ASTANA. KAZINFORM – Ekstremaldy tabıǵı-klımattyq jaǵdaılary bar shalǵaı shekara mańyndaǵy aýdandardyń turǵyndary úshin jalaqyǵa ústemeaqy jáne eńbek ótilin esepteýdiń erekshe normalaryn engizý máselesi pysyqtalyp jatyr. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Memleket basshysynyń tapsyrmasyna sáıkes, Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasyna shekara mańyndaǵy aýmaqtardy damytý jónindegi jekelegen bólimdi engizý boıynsha ózgerister men tolyqtyrýlar engizildi. Atap aıtqanda, áleýmettik jáne ınjenerlik ınfraqurylymdy damytý, shekara mańyndaǵy aýmaqtardyń respýblıkalyq jáne jergilikti mańyzy bar joldaryn salý, rekonstrýktsııalaý jáne jóndeý, shekara mańyndaǵy eldi mekenderdiń turǵyndaryna bıznes-bastamalardy, onyń ishinde aýyl sharýashylyǵy salasyndaǵy bastamalardy qoldaýǵa granttar berý, týrızmdi jáne transshekaralyq týrıstik marshrýttardy damytý úshin jaǵdaılar jasaý jáne taǵy basqa birqatar is-shara kózdelgen», - dedi Oljas Bektenov jaýabynda.
Onyń atap ótýinshe, ekstremaldy tabıǵı-klımattyq jaǵdaılary bar shalǵaı shekara mańyndaǵy aýdandardyń turǵyndary úshin jalaqyǵa ústemeaqy jáne eńbek ótilin esepteýdiń erekshe normalaryn engizý máselesi pysyqtalyp jatyr.
«Sondaı-aq atalǵan shekaralarda avtomobıl ótkizý pýnktterin jaılastyrý, jańǵyrtý jáne tehnıkalyq jaraqtandyrý boıynsha jumystar júrgizilýde. «Aýyl – El besigi» baǵdarlamasynyń aıasynda shekara mańyndaǵy aýyldarda áleýmettik jáne ınjenerlik ınfraqurylymdy damytýǵa erekshe kóńil bólinedi. Máselen, 2019-2023 jyldary respýblıkalyq bıýdjet qarajatynan 108,8 mlrd teńge somaǵa áleýmettik jáne ınjenerlik ınfraqurylym obektilerin salý, rekonstrýktsııalaý jáne jóndeý boıynsha 1 795 joba iske asyryldy. Al 2024 jyly 170 jobany iske asyrýǵa 36,6 mlrd teńge bólindi. Bul «Aýyl – El besigi» baǵdarlamasyn jalpy qarjylandyrýdyń 20 paıyzdan astamyn quraıdy», - dedi Úkimet basshysy.
