Shalǵaı eldi mekenderdiń turǵyndaryna tegin medıtsınalyq kómek kórsetiledi

ASTANA. QazAqparat - 1 shilde men 31 tamyz aralyǵynda elimizdiń barlyq óńirlerinde QR Densaýlyq saqtaý jáne áleýmettik damý mınıstrliginiń qoldaýymen, Salaýatty ómir saltyn qalyptastyrý problemalary ulttyq ortalyǵynyń uıymdastyrýymen «Densaýlyq joly-2015» keń kólemdegi aktsııasy ótedi.

Aktsııa sheńberinde terapevt, ftızıatr jáne basqa da mamandardan quralǵan jumyldyrý toptarynyń shalǵaı eldi mekenderge shyǵýy uıymdastyrylytyn bolady. Aýyl turǵyndary týberkýlez jáne AITV/JITS sııaqty áleýmettik máni bar aýrýlar boıynsha keńes alyp, sonymen qatar tegin zertteýden óte alady, dep habarlanǵan QR DSÁDM saıtynda.

Aktsııanyń maqsaty qoǵamnyń jáne memlekettik organdardyń nazaryn aýyl turǵyndarynyń densaýlyǵyn saqtaýǵa jáne nyǵaıtý máselelerine aýdarý, sonymen qatar aýyl turǵyndaryna salaýatty ómir saltyn qalyptastyrý máseleleri, minez-qulyq faktorlarymen túsindirilgen áleýmettik máni bar aýrýlar boıynsha oqý-aqparattyq jáne tájirıbelik kómek kórsetý bolyp tabylady.

Qazaqstanda týberkýlezben syrqattanýshylyq deńgeıin tómendetý jáne AITV-ınfektsııasynyń taralýyn sheginde ustaý «Salamatty Qazaqstan» memlekettik baǵdarlamasynyń basym baǵyty bolyp tabylady.