Shalǵaı eldi mekenderdiń turǵyndary áleýmettik máni bar aýrýlar boıynsha medıtsınalyq kómekti tegin alady

ASTANA. QazAqparat - Aǵymdaǵy jylǵy 1 shilde men 31 tamyz aralyǵynda el aımaqtarynda «Densaýlyq joly - 2016» respýblıkalyq aktsııasy ótedi. Shara barysynda shalǵaıdaǵy eldi mekenderge quramynda terapevter, kardıologtar, endokrınologtar, onkologtar men salaýatty ómir saltyn qalyptastyrý qyzmetiniń mamandary bar medıtsınalyq jumyldyrý toptaryn jiberý uıymdastyrylady.

Aýyl turǵyndary áleýmettik máni bar aýrýlardyń aldyn alý  týraly keńes alyp, tegin tekserýden óte alady. Bul týraly QR Densaýlyq saqtaý jáne áleýmettik damý mınıstrliginiń baspasóz qyzmetinen habarlady.

Atalǵan aktsııanyń maqsaty - qoǵam men memlekettik organdardyń nazaryn aýyl turǵyndarynyń densaýlyǵyn qorǵaý men saqtaý sonymen qatar, áleýmettik máni bar aýrýlardyń aldyn alý, salaýatty ómir saltyn qalyptastyrý máselelerine aýdarý, ártúrli aýrýlardyń profılaktıkasy boıynsha aýyl turǵyndaryna aqparattyq-aǵartýshylyq jáne konsýltatıvti-dıagnostıkalyq  kómek kórsetý, qaýipti minez-qulyq faktorlarynyń taralýyn tómendetý bolyp tabylady.

Juqpaly emes aýrýlardan (júrek-qantamyrlary, onkologııalyq aýrýlar, tynys alý músheleriniń sozylmaly patologııasy, qant dıabeti jáne t.b.) temeki shegý, tamaqtanýdyń durys emes tártibi, fızıkalyq júktemeniń jetkilikti deńgeıde bolmaýy (gıpodınamııa), ishimdik ishý sııaqty jalpy faktorlar, sonymen qatar, erte dıagnostıkalaý men emdeý sharalary arqyly aıtarlyqtaı dárejede arylýǵa bolady.

Esterińizge sala keteıik, «Densaýlyq joly» keń kólemdi aktsııasy jyl saıyn shalǵaıdaǵy aýyl turǵyndaryna sapaly ári qoljetimdi medıtsınalyq kómek kórsetý maqsatynda ótkizilip turady.