Shalǵaı aýyldarda turatyn 7 myńnan astam adam medpoıyzda tekserýden ótti
«Medıtsınalyq poıyz» Almaty, Shyǵys Qazaqstan jáne Pavlodar oblystarynyń shet aımaqta ornalasqan beketterinde boldy. Qazirgi ýaqytta ol Aqmola óńirine keldi.
Poıyz iske qosylǵan kúnnen bastap 7 420 adam, onyń ishinde 1 465 bala qabyldaýda boldy, sondaı-aq dárigerlerge kelýshilerdiń sany 20 000-nan asady, 623 kishi hırýrgııalyq ota jasaldy, 283 FGDS protsedýrasy, 2 416 ÝDZ jasaldy, jáne flıýrografııadan 1 324 adam ótti.
«Ótken jyly 124 shalǵaı bekette turatyn 40 000-nan astam turǵyn tekserildi. Bıyl biz baratyn oblystardyń sanyn kóbeıttik. Eger bir jyl buryn poıyz 9 oblystyń ǵana turǵyndaryn tekserse, bıylǵy maýsymda dárigerler brıgadasy 21 jeltoqsanǵa deıin jolda bolyp, Qazaqstannyń 14 oblysynyń 195 beketin qamtıdy. 60 000-nan astam adamdy qamtý josparlanǵan», - dedi «Samruk-Kazyna Trust» Áleýmettik jobalardy damytý qory bas dırektorynyń orynbasary Ásel Shildebaeva.
Atap óteıik, bıyl medıtsınalyq poıyz Almaty qalasynan bastaý aldy jáne Qazaqstannyń barlyq oblystarynda bolady. 17 maýsym men 7 shilde aralyǵynda medıtsınalyq poıyz Soltústik Qazaqstan jáne Aqmola oblystaryndaǵy 24 beketti aralaıdy.
Joba aıasynda elimizdiń medıtsınalyq qyzmet qoljetimsiz shalǵaı aýdandarynyń turǵyndaryna tegin medıkalyq-sanıtarlyq, konsýltatıvtik-dıagnostıkalyq kómek kórsetiledi. Medıtsınalyq brıgadalardyń quramynda terapevt, stomatolog, okýlıst, mammolog, nevropatolog, kardıolog sııaqty basqa da mamandar bar.
Esterińizge sala keteıik, 29 sáýir kúni Qazaqstanda «Medıtsınalyq poıyz» jobasy bastalǵan bolatyn. Jobany «Samuryq-Qazyna» AQ kompanııalar tobynyń atynan «Samruk-Kazyna Trust» Áleýmettik jobalardy damytý qory «Qazaqstan Temir Joly» UQ» AQ janyndaǵy Áleýmettik jobalar qorymen birlesip, sondaı-aq QR Densaýlyq saqtaý mınıstrliginiń qoldaýymen júzege asyrady.
Poıyz kestesin myna saıttardan kórýge bolady: medpoezd.kz jáne sk-trust.kz/ru.
