Shalǵaı aýyldarda kóshpeli mektep jármeńkeleri uıymdastyrylady

ASTANA. QazAqparat – Úkimet basshysy Álıhan Smaıylov shalǵaı eldimekenderde kóshpeli mektep jármeńkelerin uıymdastyrýdy tapsyrdy, dep habarlaıdy QazAqparat tilshisi.

«Barlyq bilim berý obektileri oqý jylynyń bastalýyna 100% daıyn bolýy tıis. Oqý-aǵartý mınıstri, óńir ákimderi osy máselelerdi tikeleı baqylaýǵa ustaýy qajet. Óńir ákimdikteri kómekke muqtaj balalardy 100% memlekettik qoldaý sharalarymen qamtamasyz etýi tıis. Shalǵaı aýyldarda mektep jármeńkeleri men kóshpeli avtodúkenderdi uıymdastyrý qajet», - dedi Álıhan Smaıylov Úkimet otyrysynda.

Odan bólek, Premer-Mınıstr quzyrly organdarǵa qoljetimdi baǵamen qamtýdy tapsyrdy.

«Ákimdikter, Oqý-aǵartý, Saýda, Indýstrııa mınıstrlikteri men «Atameken» palatasy oqý quraldary men mektep formasynyń qoljetimdi baǵasyn qamtamasyz etý máselelerin pysyqtaýy tıis», - deıdi ol.