Shalǵaı aýyldarda 2 dárigerlik ambýlatorııa paıdalanýǵa berildi – Almaty oblysy

TALDYQORǴAN. QazAqparat - El Táýelsizdiginiń 30 jyldyq mereıtoıy qarsańynda jáne Elorda kúni merekesine oraı Almaty oblysynyń Jambyl aýdanyna qarasty Qarasý jáne Úńgirtas aýyldyq okrýgterinde eki jańa dárigerlik ambýlatorııanyń saltanatty ashylýy ótti, dep habarlaıdy QazAqparat tilshisi.

Qarasý aýyldyq okrýginiń Sarybaı bı aýylyndaǵy ambýlatorııa okrýgke qarasty 4 aýyldyń 6000-nan astam turǵynyna sapaly medıtsınalyq qyzmet kórsetedi.

«Búgin biz aýdanymyz úshin mańyzdy oqıǵanyń kýási boldyq. Jańa aýrýhanada bilikti medıtsına mamandary jumys isteıtin bolady. Endi bul nysanda aýyldyq okrýg turǵyndary árdaıym ýaqytyly jáne sapaly medıtsınalyq kómekke qol jetkize alady. Sebebi, emhana zamanaýı medıtsınalyq jabdyqtarmen qamtylǵan», - dedi aýdan ákimi Nurlan Ertas.

Medıtsınalyq mekeme bir aýysymda 25 kelýshige arnalǵan. Sarybaı bı aýylynyń dárigerlik ambýlatorııasynda 1 joǵary bilimdi dáriger, 6 medbıke, 1 akýsher jáne 1 feldsher jumys isteıdi.

Al búgin lentasy qıylǵan Úńgirtas aýyldyq ambýlatorııasynda eresekter men balalarǵa arnalǵan qabyldaý bólmesi, tis dárigeri, gınekolog, terapevt kabınetteri, zerthana, tańý, feldsherlik, akýsherlik pýnktter jáne kúndizgi statsıonar bar.

«Jańa ambýlatorııa zamanaýı medıtsınalyq jabdyqtarmen jabdyqtalǵan. Mekeme qazirgi ýaqyttyń barlyq talaptaryna sáıkes.Ujym 12 qyzmetkerden turady. Aýysymyna 35 adamǵa deıin qabyldaýǵa múmkindigi bar. Jalpy aýyldyq okrýgte 4590 adam turady. Ambýlatorııa dárigerleri men medbıkeleri em izdegen adamdarǵa sapaly qyzmet kórsetetin bolady», - dedi ambýlatorııa meńgerýshisi Baǵlan Tobajanova.

Jambyl aýdanynda barlyǵy 54 densaýlyq saqtaý nysany bar. Olardyń kópshiligi jaqyn arada tolyqtaı jóndeýden ótken bolatyn.