Shalbaryn sheship, «ázildegen» astanalyqqa 86 myń teńge aıyppul salyndy
ASTANA. KAZINFORM — Astanadaǵy Azamattardy qabyldaý ortalyǵynda metall izdegishten ótý kezinde ádepsiz áreket jasaǵan er adamǵa 86 500 teńge aıyppul salyndy. Bul týraly qalalyq ákimshilik quqyq buzýshylyqtar jónindegi mamandandyrylǵan aýdanaralyq soty habarlady.
Sot málimetinshe, oqıǵa 24 tamyzda saǵat 09:28 shamasynda Máńgilik El dańǵylyndaǵy Azamattardy qabyldaý ortalyǵynda bolǵan. Azamat J. metall izdegishten ótý kezinde shalbaryn sheship, qoǵamdyq tártip pen azamattardyń tynyshtyǵyn buzǵan.
Sot otyrysynda er adam kinásin moıyndamaı, áreketin ázil retinde jasaǵanyn aıtqan. Alaıda onyń kinási is materıaldary men oqıǵanyń beınejazbasymen dáleldendi.
— Sot J.-ny Ákimshilik quqyq buzýshylyq týraly kodekstiń 434-babynyń 1-bóligi boıynsha kináli dep tanyp, 20 AEK, ıaǵnı 86 500 teńge kóleminde aıyppul taǵaıyndady, — delingen habarlamada.
Sot jaza belgileý kezinde quqyq buzýshylyqtyń sıpatyn jáne azamattyń qoǵamdyq tártipke anyq qurmetsizdik tanytqanyn eskerdi.
Qaýly ázirge zańdy kúshine engen joq.
Buǵan deıin Astanada 20 jyl buryn jasalǵan kisi óltirý qylmysy áshkerelengenin jazǵanbyz.
