«Shala qazaq» atty fılmniń túsirilimderi aıaqtaldy
ASTANA. QazAqparat - Sh.Aımanov atyndaǵy «Qazaqfılm» kınostýdııasynda QR Mádenıet jáne sport mınıstrligi tapsyrysy boıynsha túsirilgen shartty ataýy «Shala qazaq» atty tolyqmetrajdy kórkem fılmniń túsirilim jumystary aıaqtaldy, dep habarlaıdy QazAqparat.
Kınostýdııa baspaksóz qyzmetiniń málimetinshe, vestern janrynda túsirilgen jańa kınotýyndy qylmyskerlermen jalǵyz ózi kúreske túsken aýyldyń ýchaskelik polıtseıi týraly baıandaıdy, rejısseri - Tólegen Baıtúkenov.
«Biz bul jobaǵa byltyr kóktemnen bastap kiristik. Sol kezden stsenarıı kóptegen ózgeristerge ushyrady. Basynda komedııa túsirýdi josparlaǵan edik. Stsenarııdiń sońǵy nusqasy alty aı buryn ǵana jazylyp bitti, bul nusqanyń dúnıege kelýine ACTION rejessýra jáne montajdaý sheberhanasynyń tyńdarmany - Andreı Ten jáne meniń jarym Inna atsalysty. Fılmniń qazirgi ataýynan esh jurnaq qalmady desem artyq aıtpaǵan bolar edim. Fılmniń ataýyn alda mindetti túrde ózgertemiz. Fılmniń janry - vestern. Meniń oıymsha, bul janrda túsirilgen fılmder Qazaqstanda joqtyń qasy. Vestern túsirý úshin bizde jazyq dala da, tulparlar da, qaıratty jigitter de bar. Jáne de, vestern ýaqyt óte kele AQSh qoǵamynda oryn alǵan ózgeristerdi aıqyn kórsete aldy. Basqasha aıtqanda, vestern tarıhy - bul Amerıkanyń kóńil-kúı tarıhy. Osy vesternnyń qalybyn bizdiń elge alyp kelýdi burynnan oılap júrgenmin», - dedi kartınanyń rejısseri.
Esterińizge sala ketsek, fılmniń túsirý jumystary 10 tamyzda bastalyp, 21 kúnge sozylǵan. Kartınanyń túsirý jumystary Almaty oblysy Qapshaǵaı qalasynan 40 shaqyrym jerde ornalasqan «Brıgadır №4» aýylynda ótken.
«Jalpy, túsirilim sátti ótti. Árıne, uıymdastyrý jáne shyǵarmashylyq jaǵynan qıyndyqtar boldy. Túsirý barysynda tehnıkamyz isten shyǵyp ketip, jergilikti turǵyndar kelisilgen jumystardy oryndaýdan bas tartyp jatty. Birese jańbyr jaýyp, birde jel soqty. Jazyq daladaǵy aptap ystyqtan túsirilim toby músheleri aýyryp ta qaldy. Alaıda, meniń oıymsha osynyń bári kınematografııadaǵy qalypty jaǵdaı», - dedi rejısser.
Sonymen qatar, rejısser fılmdegi akterler men olardyń sheberligi týraly aıta ketti.
«Akterlerdiń barlyǵyna, onyń ishinde epızodtaǵy akterlerge de rızamyn. Ýchaskelik polıtseıdiń rólin jas teatr akteri Aqylhan Almasov somdap shyqty. Aqyl kıno akteri retinde áli tanyla qoıǵan joq, alaıda onyń bolashaǵy zor bolatynyna senimdimin. Onyń boıynda Kenenbaı Qojabekov, Súımenqul Chokmorov syndy keńes zamanyndaǵy qazaq jáne qyrǵyz kınosynyń artısterine tán bir asyldyq qasıet bar. Qazirgi kezde sırek kezdesetin qasıet. Al ýchaskelik polıtseıdiń áıelin - Aınany Dına Tasbolatova somdaıdy. Dına eńbekqor, drama janryndaǵy aktrısa. Ol túsirilim alańynda baryn salyp oınady. Epızod oıdaǵydaı túsirilse de, ózine unamaǵanyn alǵa tartyp, qosymsha dýbl surap júrdi. Al Qaısar esimdi antogonıst jigitti Erjan Núsipaqynov somdaıdy. Ol tájirıbeli akter. Ol kisi óltirýshini jaqsy oryndap shyqty dep oılaımyn.
Al Shyńǵys Kapın Dastan esimdi qylmyskerdiń rólin somdady. Ol qylmystyq operatsııany uıymdastyrýshy. Shyńǵys - artıst bolý úshin jaralǵan adam, naǵyz Fellını keıipkeri, óte jarqyn tulǵa. Onyń túsirilim barysyndaǵy perfomanstaryn baqylaýdyń ózi ǵanıbet», - deıdi rejısser.
Kartına kınoóndirisiniń eń qıyn montajdaý-tústeý kezeńine ótedi. Bul kezeńde jospar boıynsha fılm qarasha aıynyń ortasyna deıin bolady.
Stsenarıı avtorlary: Tólegen Baıtúkenov, Inna Muqasheva, Andreı Ten
Qoıýshy operator: Aleksandr Rýbanov
Rólderde: Aqylhan Asylov, Dına Tasbolatova, Shyńǵys Kapın, Erkebulan Tasynov, Erjan Núsipaqynov, Sálim Balǵazın, Marat Inerbaev jáne basqalary.
