Shákirtterimniń jetistigin joǵary baǵalaımyn – taekvondo bapkeri
ASTANA. KAZINFORM - Taekvondodan Qazaqstan 21 jasqa deıingi quramasynyń aǵa jattyqtyrýshysy Davran Razıev shákirtteriniń bıylǵy jetistikteri jóninde Kazinform tilshisimen oı bólisken edi.
- Qazaqstandyq jastar álem chempıonatynda joǵary kórsetkishke qol jetkizdi. Jetistikti qalaı baǵalaısyz? Kóńilden shyqty ma?
- Dúnıejúzilik dodada júldege qol sozý ońaıǵa túspeıdi. Óıtkeni, árbir sportshynyń negizgi maqsaty - jankúıerler senimin aqtaý, elge tabysty oralý. Shákirtterim bul talapty jaqsy túsindi. Árbir jekpe-jeginiń jaýapkershiligin sezindi. Sondyqtan saıys barysynda shıraq qımyldap, jeńiske degen jiger tanytty. Bul - árbir sportshyǵa qajetti qasıettiń biri. Osylaısha biz bedeldi básekede qazaqstandyq jankúıerlerdiń úmitin aqtap, jeńis tuǵyrynan kórindik, júldege qol jetkizdik. Shákirtterimniń jetistigin joǵary baǵalaımyn. Olar óte joǵary dárejede oıyn kórsetti.
Álem chempıonatyna daıyndyǵymyz joǵary deńgeıde ótti. Sportshylar tyńǵylyqty daıyndala bildi. Oqý-jattyǵý jıyndary barysynda sheberligin jetildirip, burynǵy qatelikterden sabaq alýǵa tyrysty. Bul shákirtterime oń áser etti. Alǵashqy sátten qarsylastaryn qapy qaldyrý jolyn izdedi. Olardyń arasynan Beıbarys Qablan men Batyrhan Tóleýǵalı jeńis tuǵyrynan kórindi.
- Baıqasaq, qaı-qaısysynyń da qarsylastary osal bolmaǵan sekildi. Alaıda jiger, sheberlik, jaýapkershiliktiń arqasynda bıik belesti baǵyndyrǵany kórinip tur. Aldyn ala qarsylastardy zertteı aldyńyzdar ma?
- Biz álem chempıonatyna attanar aldynda árbir iske mán beremiz. Óıtkeni, qarsylastar jaıynda mańyzdy aqparattar jınaı alsaq, ol sportshylar úshin ońaıǵa soǵady dep oılaımyn. Osyǵan baılanysty árbir jaǵdaıǵa tolyq nazar aýdara bildik. Osal tustaryn zerttedik. Bul biz úshin óz jemisin berdi. Jekpe-jek barysynda shákirtterim ózderine senimdi oıyn kórsete bildi. Nátıjesinde qarsylastar jeńiliske ushyrady. Taktıkalyq turǵyda bergen tapsyrmamyz durys bolyp shyqty. Sportshylardyń ony tolyqtaı oryndaýyna múmkindik boldy. Ol qazaqstandyq jastardyń joǵary jetistikke jetýine negiz qalady degen senimdemin.
- Jarys aldynda quramanyń maqsaty qandaı boldy? Qansha júlde alý josparda bar edi?
- Biz mundaı mejeni sportshylardyń múmkindigine qaraı saralaımyz. Áriptesterimmen aqyldasa otyryp, bir medal jıyntyǵy enshimizge buıyrady degen oıda boldyq. ıAǵnı, altyn, kúmis, qolaǵa qol jetkizýdi josparlaǵan edik. Nátıje jospardaǵydan joǵary boldy. Alǵa qoıǵan maqsatty tolyqtaı oryndaı aldyq.
- Shákirtterińizdiń múmkindigin qalaı baǵalaısyz?
- Álem chempıonatynda eshqandaı osal qarsylas bolmaıdy. Ábden ysylǵan sheberler keledi. Ony dúbirli dodanyń ótý barysynda anyq baıqaǵan bolatynbyz. Dese de shákirtterim jaqsy nátıje kórsetýge tyrysty. Saıys barysynda shıraq qımyldap, barynsha joǵary jetistikke qol sozýǵa kúsh saldy. Árıne, oılaǵandaı júzege asa bermeıtini taǵy bar. Dese de olardyń jeńiske degen jigeri kórinip turdy. Eshqaısysyn bólip jarmaımyn. Shákirtterim áli de tájirıbe jınaqtap, aldaǵy ýaqytta jankúıerlerdi zor tabysymen qýantady degen oıdamyn. Jalpy, júldeli oryndarǵa qol jetkizý múmkindigimiz joǵary boldy. Atap aıtqanda, Nazym Mahmýtova, Altynshash Ydyrys, Marııa Sevostıanova shırek fınalda súrinip, júldege qol sozym jerde qaldy. Aldaǵy ýaqytta halyqaralyq jarystarda qazaqstandyq taekvondoshylar budan da joǵary jetistikterge qol jetkizedi degen senimdemin.
- Álem chempıonatynda ózge elderdiń quramalary qandaı dárejede oıyn kórsetti? Olardyń jetistigin qalaı baǵalaısyz?
- Dúbirli dodaǵa eshkim álsiz sportshysyn jibermeıdi. Bul maqsatta árbiri qanshama ýaqytyn jumsaıdy. Oqý-jattyǵý jıyndaryn ótkizedi. Tynbaı ter tógedi. Keıingi jyldary álemde sporttyń bul túri keńinen damyp keledi. Jarysqa qatysýshy jastardyń deńgeıi artqanyn ańǵaryp júrmiz. Sondyqtan bizdiń qurama úshin árbir saıys ońaıǵa túspeıtinin baıqaý qıyn emes. Qarsylastyń osal tusyn taýyp, upaı qoryn molaıtýǵa mańyz berdik. Árıne, ózine degen senimdilik árbir sportshyǵa kúsh beredi dep oılaımyn.
Ras, bizdiń quramada burynnan talaı dodada baq synaǵan shákirtterim az bolǵan joq. Dúnıejúzilik dodada ábden ysylǵan jastar bul joly da óz múmkindigin múlt jibermeýge tyrysty. Bastysy, oılaǵanymyz júzege asty.
- Alda qandaı jarystar bar ?
- Bizdi áli de kóptegen saıystar kútip tur. Sondyqtan daıyndyq máselesin esten shyǵarmaımyz. Sportshylardyń árdaıym babynda bolýyna nazar aýdaramyz. Oqý-jattyǵý jıyndary jalǵasady. Olardyń sheberligin shyńdaýǵa, tájirıbesin arttyrýǵa kóńil bólemiz. Qazaqstandyq taekvondoshylar áli de jankúıerlerdi qýantatyn bolady degen oıdamyn. Oǵan laıyqty jastarymyz bar. Bastysy, biz olardyń únemi babynda bolýyn qadaǵalap, tolaıym tabystarǵa jol ashamyz.
Aıta ketsek, budan buryn taekvondodan 21 jasqa deıingiler arasynda álem chempıony atanǵan Beıbarys Qablanmen suhbattasqan edik.
- Árbir dúbirli doda aldynda erekshe sezimde bolatynyń belgili. Joǵary tabysqa qol sozýdy qalaısyń. Sol maqsatta uzaq ýaqyt boıy ter tógýge týra keledi. Qazir kóńil kúıim óte keremet. Jospardy oryndaı bildik. Tuńǵysh álem chempıony bolǵanyma qýanyshtymyn, - dedi ol.