Shákirti 42 elden shaqyrtý alǵan ustazǵa Túrkistan oblysynyń ákimi kólik syılady
TÚRKІSTAN. KAZINFORM - Ustazdar merekesine oraı uıymdastyrylǵan saltanatty jıynǵa qatysqan Túrkistan oblysynyń ákimi Darhan Satybaldy bilim salasynda aıanbaı eńbek etken barsha ustazdar qaýymyn kásibı merekemen quttyqtady.
Óńir basshysy respýblıkalyq, oblystyq olımpıada jáne sport jarystarynyń jeńimpazdaryn daıyndaǵan 30 muǵalimge óz atynan marapat usynyp, arnaıy syılyqtar tabystady. Onyń ishinde 10 ustaz «Altynsarın» tósbelgisi men 20 pedagog «Qurmet gramotasyn» alyp, 200 myń teńge kóleminde aqshalaı syıaqymen yntalandyryldy. Sondaı-aq, kópti tańǵaldyrǵan keshtiń kýlmınatsııa tosynsyıymen jalǵasty. Darhan Amangeldiuly shákirti 42 elden shaqyrtý alǵan «Túrkistan Bilim-ınnovatsııa» lıtseıiniń geografııa pániniń muǵalimi Bastamı Arǵyn Erjanulyna kólik kiltin tabystady. Budan bólek, oqýshylary respýblıkalyq olımpıadanyń jeńimpazy bolǵan jáne oblystyq, respýblıkalyq baıqaýlardyń júldegeri atanǵan Tólebı aýdany, Qosan Mamytov atyndaǵy mektebiniń bıologııa pániniń muǵalimi, 6 balanyń anasy Nurılla Baımahanqyzyna noýtbýk syılady.
«Qurmetti ustazdar! Barshańyzdyń otbasylaryńyzǵa – amandyq, denderińizge saýlyq, eńbekterińizge tabys tileımin. Mereke qutty bolsyn! Ustaz – jaı bilim beretin mamandyq ıesi emes. Ol – ekinshi ata-ana, tárbıeniń de qaınar kózi. Bárimiz de ustazdarǵa qaryzdarmyz. Sondyqtan ulaǵatty ustazdardyń aldynda barlyq adam qurmetpen bas ıedi», – degen Darhan Satybaldy bilim salasynda jetken jetistiktermen de bólisip, eleýli eńbektiń bári ustazdardyń qajyrly eńbeginiń jemisi ekenin atap ótti.
Ustazdar qaýymy kóterińki kóńil kúımen arnaıy jaıylǵan dastarhanda qonaq bolyp, balalardyń ázirlegen merekelik kontsertin tamashalady. Ónerli ul-qyzdar án men bıden shashý shashty.
Aıta keterligi, Túrkistan oblysynda jalpy 85 112 pedagog sanaly urpaqqa sapaly bilim berip keledi.
