Shaqpaq qanttyń baǵasy bir jylda 51,7% ósken

ASTANA. QazAqparat – Qazaqstandaǵy baǵa statıstıkasy 85 eldi mekende ornalasqan 12 myńnan astam saýda nysanyndaǵy baǵa kórsetkishi boıynsha júrgiziledi. Bul týraly Stretageılıaq joqsparlaý jáne reformalar agenttiginiń tóraǵasy Áset Erǵalıev Májilis depýtattarynyń saýalyna joldaǵan jaýabynda aıtty, dep habarlaıdy QazAqparat tilshisi.

«Qazaqstanda halyqaralyq standarttarǵa sáıkes 508 taýar men qyzmet túri boıynsha baǵaǵa monıtorıng júrgiziledi. Ulttyq statıstıka bıýrosynyń qyzmetkerleri aı saıyn ártúrli eldi mekenniń túrlik bólikterinde ornalasqan, taýarlarynyń assortımenti keń saýda obektileriniń iriktemeli sheńberi (saýda jelileri, bazarlar, úı qasyndaǵy dúkender) boıynsha baǵalardy tirkeıdi. Osylaısha, Qazaqstan Respýblıkasynyń barlyq aýmaǵy boıynsha 85 eldi mekendegi 12 myńnan astam saýda obektisi turaqty zertteýlerge qatysady», - dep jazady agenttik basshysy.

Áset Erǵalıev ınflıatsııa esepteýdiń tásilin túsindirý úshin Astana qalasynda pııaz baǵasy qalaı baqylanatynyn mysalǵa keltirgen.

«Astana qalasy boıynsha baıqaýǵa barlyǵy 426 bazalyq obekt qatysady, onda 508 taýar men qyzmettiń baǵasy baıqalady. Onyń ishinde 12 nysanda pııazdyń baǵasyna baıqaý júrgiziledi. Sáýir aıynyń sońyna osy 12 saýda obektisinde pııaz baǵasynyń dıapazony kılogrammyna 151 teńgeden 300 teńgege deıingi aralyqta boldy. Nátıjesinde sáýir aıynyń sońyna Astana qalasy boıynsha pııazdyń ortasha baǵasy kılogramyna 202 teńgeni qurady. 2022 jylǵy sáýirmen salystyrǵanda Astana qalasynda pııazdyń baǵasy 31 teńgege nemese 18,1% qymbattady», - delingen jaýapta.

Resmı statıstıka boıynsha joǵaryda atalǵan 508 taýar men qyzmettiń ishinde baǵasy bir jylda 100 paıyz ósken sanattar bar.

«Sáýirdiń qorytyndysy boıynsha jyldyq esepteýde (12 aıǵa) respýblıka boıynsha ortasha alǵanda shaqpaq qant – 51,7%, qııar – 50,9%, konservilengen sút – 44,5%, kúrish – 43,9%, keptirilgen órik – 40,8%, eritilgen irimshik 39,1% qymbattady. Osy taýarlarǵa baǵanyń joǵary ósýi saldarynan tutynýshylarda ınflıatsııa resmı jarııalanǵan mánderden joǵary bolýy kerek degen pikir jıi qalyptasady. Degenmen, keıbir taýarlardyń baǵasy tezirek, basqalaryna baǵa baıaýyraq ósetinin jáne kerisinshe, basqalarynyń baǵasy tómendeıtindigin eskerý qajet. Sonymen, sáýirdiń qorytyndysy boıynsha jyldyq esepteýde (12 aıǵa) respýblıka boıynsha ortasha alǵanda jylqy eti – 11,9%, shıkideı ystalǵan shujyq – 11,6%, sıyr eti – 11,1%, tátti burysh – 9,5%, qoı eti – 9,3%, kúnbaǵys maıy – 8,3%, alma 7,5% qymbattady. Sonymen qatar baǵa qyryqqabat – 53,4%, sábiz – 19,2%, sarymsaq – 15,9%, kartop 13,9% arzandady. Árbir óńirdegi baǵa ósimi jeke sıpatta bolatyndyǵyn eskerý qajet», - deıdi Áset Erǵalıev.