Shákızada Ábdikárimov: Abaı qazaqtyń basty baǵdaryn aıqyndap berdi

QYZYLORDA. QazAqparat - «Búgin alash jurty alǵash ret Abaı kúni merekesin toılap jatyr. Ultyn súıgen ulyq tulǵany taný, ony dáripteý - biz úshin basty maqsat bolýy tıis. Bıylǵy mereıtoı bul baǵytta keleshekte qolǵa alatyn ıgilikti isterdiń bastaýy dep sanaımyn», dedi QR Jazýshylar jáne jýrnalıster odaǵynyń múshesi, aqyn, «Qyzylorda qoǵamdyq» teleradıokompanııasy JShS quryltaıshysy Shákızada Ábdikárimov QazAqparat tilshisine.

Onyń aıtýynsha, álemniń kóptegen elderinde ult damýynda óz orny bar tanymal tulǵalardy dáripteýge mańyz beriledi. Atap aıtqanda, Reseıde Esenın, Ózbekstanda Álisher Naýaı shyǵarmashylyǵy keńinen nasıhattalady.

«Abaıdyń qazaq halqy tarıhynda alatyn orny erekshe. Ulty úshin eren eńbek sińirgen tulǵa qaı kezde de biz úshin alǵa bastaıtyn baǵdarsham ispettes. Abaı bilimdi myńdy jyǵatynyn sanamyzǵa shegeledi. Qazir jan-jaǵymyzǵa baıyppen qarap kórsek, sol sózdiń ras ekendigin tolyq tanımyz. Jumyr jerde bilim men ǵylym salasy ozyq ketken memleketter sany az emes. Biz de sol bıikten kórinýge umtylǵanymyz jón. Shúkir, búginde elimiz azattyqqa qol jetkizdi. Bizdiń álem jurtshylyǵy aldynda eńsemiz bıik bolýy úshin qandaı qadam jasaýymyz tıis? Biz sol jaıynda oılanýymyz qajet. Sonda ózgeniń aldyna túsýge, ozyq bolýǵa múmkindik bar. Bul oraıda Abaı qazaqtyń basty baǵdaryn aıqyndap berdi», - dedi ol.

Shákızada Ábdikárimov bul oraıda Memleket basshysy Qasym-Jomart Toqaevtyń 10 tamyzdy Abaı kúni retinde jarııalaýy el tarıhyndaǵy erekshe oqıǵa ekenin aıtyp ótti.

«Endigi kezekte Abaı jaıynda jylma-jyl keń aýqymda nasıhat jasalady. Onyń álemin túsinýge, nusqaǵan baǵdar-baǵytyn tanýǵa jol ashylady. Biz aldaǵy ýaqytta ne jasaýymyz qajet? Boıymyzda qandaı jat ádetter bar? Sony talǵam tarazysyna tarta alamyz. Memleket basshysy óziniń respýblıkalyq baslymdarda jarııalanǵan maqalasynda «Biz básekege qabiletti memleket bolý úshin Abaı murasyn esten shyǵarmaýymyz kerek. Sebebi ult retindegi jańarý ıdeıasy da onyń kózqarasymen úndesip jatqany anyq» dep atap kórsetti. Qazaqstan táýelsiz memleket retinde alǵa qadam basyp keledi. Endeshe, biz Abaı jazǵan dúnıelerdi oqı otyryp, keleshek kemerinde ult retinde qalaı qalyptasa alamyz degen saýalǵa jaýap tabamyz», - dedi Sh.Ábdikárimov.