Shaqyrtý qaǵazy, medkomıssııa, keıinge qaldyrý: elde áskerge shaqyrý tártibi qandaı
ASTANA. KAZINFORM — Qazaqstanda áskerge shaqyrý birneshe kezeńnen turady. Azamatqa shaqyrtý qaǵazy jiberilgennen keıin onyń derekteri naqtylanyp, medıtsınalyq tekserý júrgiziledi jáne áskerı qyzmetke jaramdylyq sanaty anyqtalady. Keı jaǵdaıda áskerge shaqyrý merzimin keıinge qaldyrýǵa da bolady. Áskerge shaqyrylýshylar úshin negizgi tártipterdi túsindiremiz.
Shaqyrtý qaǵazy qalaı beriledi?
Shaqyrtý qaǵazy — azamatty jergilikti áskerı basqarý organyna shaqyrý sharalaryna qatysýǵa mindetteıtin resmı qujat. Ol birneshe jolmen beriledi.
Qujat azamatqa qol qoıdyrý arqyly jeke tabystalýy múmkin. Sonymen qatar jumys berýshi nemese oqý orny arqyly jetkiziledi. Budan bólek, tsıfrlyq habarlamalar da qoldanylady: shaqyrtý eGov.kz portalyndaǵy jeke kabınetke, eGov Mobile qosymshasyna nemese SMS arqyly jiberiledi. Bul tártip 2025 jyldan bastap zańdy kúshine endi.
Shaqyrtý qaǵazynda áskerı basqarý organyna keletin kún, ýaqyt jáne mekenjaı kórsetiledi.
Qujatty alǵannan keıin azamat ondaǵy málimetterdi tekserýi kerek. Atap aıtqanda, aty-jóni, mekenjaıy, kelý kúni men shaqyrý maqsaty durys kórsetilgenine kóz jetkizgen jón. Sondaı-aq jeke kýálik, tirkeý kýáligi, bilim týraly qujat nemese oqý ornynan anyqtama, medıtsınalyq qorytyndylar jáne keıinge qaldyrýǵa negiz bolatyn qujattar aldyn ala daıyndalýy qajet.
Shaqyrtý alǵan adam birden áskerge kete me?
Joq. Shaqyrtý qaǵazy azamatty birden áskerı bólimge jiberýdi bildirmeıdi.
Ádette shaqyrtý derekterdi naqtylaý, medıtsınalyq tekserýden ótý, áskerı qyzmetke jaramdylyq sanatyn anyqtaý jáne keıinge qaldyrýǵa negiz bar-joǵyn tekserý úshin beriledi.
Sondyqtan shaqyrtý alǵan azamat belgilengen ýaqytta áskerı basqarý organyna baryp, qajetti rásimderden ótýi kerek.
Dáleldi sebepsiz shaqyrtý boıynsha kelmegen jaǵdaıda ákimshilik jaýapkershilik qarastyrylǵan. Al áskerge shaqyrýdan júıeli túrde jaltarý qylmystyq jaýapkershilikke ákelýi múmkin.
Kimderge keıinge qaldyrýǵa bolady?
Áskerge shaqyrý merzimin keıinge qaldyrý birneshe jaǵdaıda qarastyrylǵan. Olardyń qatarynda:
-
otbasy jaǵdaılary;
-
bilim alýdy jalǵastyrý;
-
densaýlyq jaǵdaıy;
-
aýyldyq jerlerde jumys isteıtin pedagogter men dárigerler;
-
depýtattar;
-
azamattyq avıatsııa jáne keme ekıpajdarynyń músheleri;
-
quqyq qorǵaý organdarynyń bilim berý uıymdarynda alǵashqy kásiptik daıarlyqtan ótip jatqan adamdar bar.
Keıinge qaldyrýdy rásimdeý úshin ony rastaıtyn qujattardy usyný qajet. Sońǵy sheshimdi áskerge shaqyrý komıssııasy qabyldaıdy.
Shetelde oqyp júrgender ne isteýi kerek?
Eger áskerge shaqyrylýshy sheteldegi oqý ornynda kúndizgi bólimde bilim alyp júrse, áskerge shaqyrý merzimin keıinge qaldyrýǵa ótinish bere alady.
Ol úshin oqý ornynan anyqtama alyp, eGov.kz portaly arqyly ótinish berý qajet. Qajet bolǵan jaǵdaıda anyqtama qazaq nemese orys tiline notarıaldy kýálandyrylǵan aýdarmasymen birge usynylady.
Ótinishti qaraý qorytyndysy boıynsha sheshimdi áskerge shaqyrý komıssııasy qabyldaıdy.
Belgilengen ýaqytta kele almasa, ne isteý kerek?
Eger azamat shaqyrtýda kórsetilgen ýaqytta kele almaıtyn bolsa, jergilikti áskerı basqarý organyna aldyn ala habarlap, kelmeý sebebin qujatpen rastaýy qajet.
Mysaly, densaýlyǵyna baılanysty kele almaǵan jaǵdaıda medıtsınalyq anyqtama, al oqý nemese jumysqa qatysty sebep bolsa, ony rastaıtyn tıisti qujat usynylady, ıaǵnı shaqyrtý alǵannan keıin eń bastysy — kórsetilgen talaptardy oryndap, qajet qujattardy ýaqytynda daıyndaý. Bul áskerge shaqyrý rásiminiń belgilengen tártippen ótýine múmkindik beredi.
Eske salaıyq, munyń aldynda merzimdi áskerı qyzmetke shaqyrý tártibine qandaı ózgerister engizilgeni jóninde jazǵan edik.
