Shákirtterime esh ókpem joq - Aleksandr Maltsev, hokkeıden qyzdar quramasynyń bapkeri
SAPPORO. QazAqparat - VІІІ qysqy Azıada oıyndarynda qola júldeger atanǵan hokkeıden Qazaqstannyń quramasynyń bapkeri jarystan soń óz oıymen bólisti, dep habarlaıdy Sapporodaǵy QazAqparat tilshisi.
«Oıyn tamasha ótti. Men shákirtterime alańnyń keı bólikterinde jınaqy oınaý kerektigin tapsyrdym. Olar sol tapsyrmany oryndaı bildi. Biz sol arqyly basymdyqqa ıelik ettik. Qarsylastarmyzda baryn saldy, alaıda jalpy alǵanda biz jaman oınaǵan joqpyz. Sonyń arqasynda qola júldege qol jetkizip otyrmyz. Oıynshylaryma esh ókpem joq. Olar qoldan kelgenderiniń bárin kórsetti. Jyldamdyq - búgingi hokkeı matchynda eń negizgisi boldy», - dep atap ótti bas bapker.
Esterińizge sala keteıik, hokkeıden Qazaqstannyń qyzdar quramasy Sapporodaǵy Azıada oıyndarynda jalpy bes oıyn ótkizip, úsheýinde qarsylastarynan basym tússe, Japonııa men Qytaı quramasynan utylyp qaldy. Biraq, qola medal úshin tartysta qarsylastaryn 8:0 esebimen utyp júldeger atandy.
FOTO Danııara Maılybaeva
