Shakıranyń Bishkektegi kontsertine kórermenniń jartysy shetelden keledi
ASTANA. KAZINFORM — Kolýmbııalyq ánshi Shakıranyń «Bıshkek Arenada» ótetin kontserti Qyrǵyzstanǵa 30 myńǵa jýyq sheteldik týrıst tartyp, el ekonomıkasyna shamamen 30 mıllıon dollar kiris ákelýi múmkin. Bul týraly Kazinform agenttigi Kabarǵa silteme jasap habarlaıdy.
Mundaı boljamdy Qyrǵyzstannyń Týrızmdi damytý jónindegi memlekettik agenttiginiń basshysy Edýard Kýbatov aıtty.
Onyń sózinshe, kontsertke 60 myńǵa jýyq adam keledi, olardyń jartysy — sheteldikter. Esep boıynsha, árbir sheteldik týrıst bılet, turý, kólik jáne logıstıka shyǵyndaryna Qyrǵyzstanda shamamen 940 dollar jumsaıdy.
— Shakıranyń kontsertine kelgen 30 myń týrıst bir kúnde shamamen 30 mıllıon dollar jumsaıdy. Bul — el ekonomıkasyna túsetin qomaqty qarjy ári ulttyq ekonomıkanyń damýyna qosylatyn eleýli úles, — dedi Kýbatov.
Ol jaqynda ashylǵan «Bıshkek Arena» sporttyq jarystarmen ǵana shektelmeı, mádenı jáne etnomádenı sharalar, mýzykalyq festıvalder men álemdik juldyzdardyń kontsertteri ótetin iri ortalyqqa aınalýy múmkin ekenin atap ótti.
Týrızmdi damytý jónindegi memlekettik agenttik basshysynyń esebinshe, arenada 15-20 iri is-shara ótkizý onyń 5-7 jyl ishinde ózin-ózi aqtaýyna jáne aldaǵy ýaqytta el ekonomıkasyna qomaqty úles qosýyna múmkindik beredi.
Eske sala keteıik, Shakıranyń Qyrǵyzstandaǵy kontserti 18 qazanda jańadan ashylǵan «Bıshkek Arena» stadıonynda ótedi.
