Shakıra Kolýmbııanyń jer silkinisinen zardap shekken óńirine mektep salyp beretin boldy
ASTANA. KAZINFORM – Belgili ánshi Shakıra Kolýmbııada 10 tamyzda bolǵan joıqyn jer silkinisi kezinde eń qatty zardap shekken aımaqtardyń biri - Choko departamentine bardy, dep habarlaıdy Kazinform agenttigi ABC7 Los Angeles-ke silteme jasap.
Óńirge barǵan saparynda kolýmbııalyq ánshi 10 mektepti qaıta qalpyna keltirip, qatty búlingen tehnologııalyq ýnıversıtetke kómek kórsetkisi keletinin málimdegen.
Mektepterdi qalpyna keltirýge amerıkalyq fılantrop Govard Baffettiń qory da qatysady. Olar bul isti 22 jyldan beri Shakıranyń Choko departamentinde bilim berý jobalaryn júzege asyryp kele jatqan Fundación Pies Descalzos atty qaıyrymdylyq qorymen birlese atqarmaq.
Ánshi sondaı-aq jer silkinisinen qatty búlingen Choko tehnologııalyq ýnıversıtetin qalpyna keltirý jumystaryna da qoldaý bildirýge nıetti ekenin jetkizdi.
7,4 baldyq jer silkinisi 10 tamyzda Kolýmbııanyń batysynda bolǵan edi. Sońǵy derekter boıynsha, qurbandar sany 300 adamnan asty. Odan bólek 426 adam is-túzsiz joǵalyp ketti.
Zilzala oshaǵy eldiń eń bir kedeı óńiri - Choko departamentinde ornalasqan. Munda myńdaǵan úıler qulap, júzdegen bilim berý mekemeleri búlindi.
Raıhan Rahmetova
