Shákir Ábenovtiń Elbasyǵa kıgizgen shapany Almatyǵa jetkizildi
Kórmege qoıylǵan ekspozıtsııalar jas memleketimizdiń qurylýy men Tuńǵysh Prezıdenttiń eńbek jolynan syr shertedi. Kórme qonaqtary úshin zalda Nursultan Nazarbaevtyń jeke qorynan alynǵan 800 erekshe eksponat pen arhıv qujattary, fotolar men shet memleketter tabys etken nagradalar qoıylǵan.
«Bul jerde baǵa jetpes qundy arhıv qujattary qoıylǵan. Elbasynyń jas kezi men 30 jastaǵy hronıkalaryn kórýge bolady. Elbasynyń belsendi komsomol kezinen kóshbasshyǵa aınalǵanǵa deıingi ómir jolymen tanysýǵa bolady», - dedi QR Tuńǵysh Prezıdenti - Elbasynyń kitaphanasy dırektorynyń orynbasary Kúlaısha Aqtaeva.
Kórmedegi qundy eksponattardyń biri - Bólek batyrdyń dýlyǵasy. Otbasylyq qundy jádiger 2004 jyly Tuńǵysh Prezıdent murajaıyna tabys etilgen.
Kórmege 1991 jyly alǵashqy ınaýgýratsııa kezinde el aqsaqaly Shákir Ábenov Elbasyna batasyn berip, ıyǵyna japqan shapan qoıylǵan.
Elbasyǵa tabys etilgen halyqaralyq nagradalar da kórme tórinen oryn alǵan.
Kórmeniń ashylýynda sóz sóılegen Almaty ákimi Baýyrjan Baıbek Elbasy basshylyǵymen qolǵa alynǵan aýqymdy sharalardyń mańyzdylyǵyna toqtaldy.
«Táýelsiz Qazaqstannyń qurylýy men búgingi jetistigi Elbasy Nursultan Nazarbaevtyń esimimen tikeleı baılanysty. Memleket basshysynyń jetekshiligimen júzege asyp jatqan aýqymdy saıası, ekonomıkalyq jáne rýhanı jańǵyrý baǵdarlamasy Qazaqstandy damyǵan 30 eldiń qataryna qosady», - dedi Almaty ákim Baýyrjan Baıbek.
Kórme Almatyda eki aıǵa jalǵasady. Keıin kóshpeli kórme Qaraǵandy men Shymkent qalasyna jol tartady.
