Shákeevti izdeý toby ekstrasensterdiń nusqaǵan jerlerin tekserip shyqty
ASTANA. QazAqparat - Almatyda tanymal kompozıtor Erkesh Shákeevtiń iz-tússiz joǵalyp ketken 25 jastaǵy ulyn izdeý sharalary altynshy táýlikke sozyldy, alaıda Safar Shákeev ázirge tabylǵan joq. Bul týraly Shákeevtar otbasynyń dosy Vıktorııa Momynbaeva málim etti.
«Safar Shákeev joǵalǵaly beri alty táýlik boıy polıtsııanyń, dostarynyń jáne eriktilerdiń kúshimen izdestirýdiń barlyq sharalary atqaryldy: myńdaǵan adamdar men kýágerler suraldy, beınebaqylaý kameralary men drondarmen áýeden túsirgen vıdeolar qaraldy, izdestirý habarlamalary qalanyń barlyq aýdandarynda, vokzaldar men qoǵamdyq kólikterge japsyryldy, barlyq telefon qońyraýlary boıynsha jumystar atqaryldy. Remızovka aýdany jáne onyń mańaıyna tolyq sholý jasaldy, barlyq bos alańqaılar men qudyqtar, shóp ósip ketken jerler men ózender tekserildi», - dep atap ótti eriktilerdiń shtab jetekshileriniń biri V.Momynova.
«Sonymen qatar biz ekstrasens qabileti bar adamdardyń nusqaǵan barlyq jerlerin jiti qarap shyqtyq. Búgingi kúnge bizde jańa nusqalar joq, jáne biz áli kúnge deıin bar biletinimiz - Safardy 16 shilde kúni tańǵy 07:30-da Vesnovka-ál-Farabı qıylysynda túsip qalǵany ǵana», - dep qynjylady ol.
Sonymen birge ol shtabtyń orny aýysqandyǵyn da habarlaı ketti.
«Qurmetti eriktiler! Shtab Zenkov kóshesi qıylysyndaǵy Gogol, 39 kóshesine, bıik ǵımarattyń 4-shi qabatyna aýysty. Kezekshi shtabtyń táýlik boıy isteıtin telefondary: uıaly baılanys - 8707928649, qalalyq - 259 01 14», - dep jazdy V.Momynbaeva.
«Іzdeýge shyn nıetimen kómektesip, bizben birge izdestirý jumystaryna belsendi atsalysqan adamdarǵa alǵysymyzdy bildiremiz! Gazet, radıo men telearnalar arqyly halyqqa habarlandyrýda qol ushyn bergen BAQ ókilderine rızashylyǵymyz sheksiz. «Safardyń uıaly telefony tabylypty» degen aqparattyń jalǵan ekendigin de habarlaǵymyz keledi. Eriktilerge, izdestirýge qatysyp jatqan azamattarǵa sý, jańbyrdan qorǵaıtyn kıim men jaryq qurylǵylaryn ákelip bergen adamdarǵa da alǵys aıtamyz», - dep túıdi sózin ol.
