«Shákárimniń ar ilimi» atty ǵylymı-tanymdyq kitap dúnıege keldi
ASTANA. Sáýirdiń 20-sy. QazAqparat - QR Parlamenti Májilisiniń birinshi jáne ekinshi shaqyrylymdarynyń depýtaty, fılosof qalamger, ekonomıka ǵylymdarynyń doktory Myrzageldi KEMEL Shákárimniń óz shyǵarmalary men jazba derekter negizinde «Shákárimniń ar ilimi» atty ǵylymı-tanymdyq kitap jazyp bitirdi,
dep habarlaıdy QazAqparat.
Shákárim Abaı sekildi dara ári kúrdeli tulǵa. Qazaq aqyndarynyń ishinde Shákárimniń óleńderi men ózge de shyǵarmalary alǵashqylardyń biri bolyp baspa betin kórgen, sondyqtan ol qazaq jazba poezııasynyń negizin salýshylardyń biri retinde atalýy oryndy.
Shákárim júıesiz zamanda ómir súrgen. Abaıdyń ýaqyty otarshyldyq - bir júıege baǵynǵan, belgili bir talaptarǵa moıynsunǵan zaman bolsa, Shákárimniń kezi patsha úkimeti men bolshevıkter, alashordashylar úkimeti, odan keıingisi zobalań jyldarǵa ulasyp, naǵyz beıbereket, júıesiz zamanǵa tap kelgen. Shákárim óz dáýirindegi qazaq eliniń túsinik-tanymynyń dárejesin, áleýmettik-mádenı turmysynyń jaıyn, halyqtyń psıhologııalyq kúıin, oı-sana deńgeıin, álemdik keńistik pen ýaqyt aýqymyndaǵy ornyn, olardyń ózge eldermen salystyrýǵa kelmeıtindeı deńgeıde ekenin jaqsy túsingen. Osyndaı qıly zamannyń ózinde arlylyqty, danalyqty, bilim-ǵylymdy bárinen bıikke qoıý arqyly rýh bıigine jetken Shákárimdi týǵan halqy eshýaqytta umytpaq emes.
Qalamgerdiń aıtýynsha, bul zertteý eńbek Shákárimniń aqyndyǵy emes, onyń ıntellekti, ishki jan dúnıesi, parasaty men paıymy, fılosofııasyna arnalǵan. Bul kitaptyń basty maqsaty - Shákárimniń adamshylyq pen arǵa negizdelgen sóz asyldaryn halyqqa jetkizý.
Kitaptyń birinshi bólimi Shákárimniń balalyq shaǵy, jastyǵy men jetilý jyldary, aǵaıyn-týystary, týǵan jer tabıǵaty degen taqyryptar tóńireginde órbigen. Sondaı-aq bastapqy bólimge Shákárim - Abaıdyń shákirti, Ar ilimi, Danalyq, Jalǵyzdyq, Ólim syry, Shákárimniń naqyl sózderi men oılary arqaý bolǵan.
«Shákárimnen soń» dep atalǵan ekinshi bólimde Aqtalý, Máńgilik mura, Shákárimniń tustastary men zertteýshileriniń sózderi taqyryptary qamtylǵan. Úshinshi bólim «Shákárim joly» dep atalǵan.
«Bul eńbek Shákárimdi ataı almaǵan, tanı almaǵan ýaqytymyzǵa salaýat aıtyp, ólgenimiz tirilip, óshkenimizdiń janǵanyn baǵalap, asylymyzdyń qadirin bile tússek degendi maqsat tutqan. Bul kitabymdy jýyrda jazyp bitirdim. Endi bir baspaǵa usynýdy josparlap otyrmyn»,- deıdi Myrzageldi KEMEL.
