Shákárim Qudaıberdiulynyń zattary mýzeıge tabystaldy
Baspasóz konferentsııasynda Ernur Ázimbaev shańyraǵynda saqtalǵan aqyn, fılosof, tarıhshy Shákárim Qudaıberdiulynyń ózi tutynǵan jáne óz qolymen jasaǵan baǵa jetpes buıymdaryn kópshilik aldynda saltanatty túrde mýzeıge tartý etti. Atap aıtqanda: soıyl, aǵashtan oımyshtalyp jasalǵan saptyaıaq. Sonymen qatar shaqsha, fotosýretter, kitaptar, Shákárim qajynyń jasaǵan oıý-órnek úlgisiniń kóshirmeleri, syrmaq syıǵa tartyldy. Mýzeıge syıǵa berilgen bul jádigerler baǵa jetpes qundylyǵymen erekshelenedi. Sh.Qudaıberdiuly jazyqsyz jazaǵa ushyraǵannan keıin, jeke saqtalǵan zattary osy kúnge deıin tabylmaı kelip edi. Saıatqorada jalǵyz turyp, shyǵarmashylyqpen aınalysqan aqynnyń ańshylyqpen, saıatkershilikpen aınalysqany belgili. Syıǵa tartqan osy shoqpardy talaı ret ańshylyqta ustaǵany sózsiz. Sonymen birge, Ernur Ázimbaev qundy jádigerlerdiń búgingi tańda eshbir mýzeıde joqtyǵyn atap ótti.
«Men, Ázimbaev Ernur Musabaıuly, Tobyqty Yrǵyzbaı, Óskenbaıdyń Myrzataı degen aǵasynan taraımyz. Myrzataıdan Juman, onyń 9 ulynyń bireýi Ázimbaı. Juman atamyz «Abaı jolyna» kirgen adam. Shákárim atylǵanda nemere aǵaıyny Ázimbaev Qydyr, Ázimbaev Shyńǵys aqynnyń kóp dúnıelerin alyp qalady. Bala kezimde Shákárim tóseginde jatyp júrdim. Men kishkentaı kezimde 10 jasqa deıin myna úlken ákemniń balasy boldym, Shákárim tósegi dep Qydyr atammen birge jatyp júrdim. Shoqpardy úlken atamyz Qydyr ómir boıy ustap otyratyny kóz aldymda. «Oı jaryqtyq Shákárim» dep aıtyp otyratyn. Ol kezde bári Shákárim atyn aıtýǵa qorqatyn, biraq bizdiń úıde qoryqpaı aıta beretinbiz»,- dedi E.Musabaıuly.
Jádigerlerdiń mýzeı qoryna tabystalýy - elimizdiń baı tarıhy úshin, abaıtaný, shákárimtaný, mýzeıtaný úshin eleýli jańalyq.
Bas qosýǵa Semeı qalasynan kórme uıymdastyrý úshin arnaıy kelgen Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-murajaıynyń jetekshi ǵylymı qyzmetkeri M.Muhamedova qazirgi tańda Shákárimniń jeke zattarynyń Abaı murajaıynda da joq ekendigin aıta kelip, bul jádigerlerdiń asa qundylyǵyna toqtaldy. Semeı qalasynyń Mádenıet jáne tilderdi damytý bóliminiń bastyǵy Kópbaev Berik Kópbaıuly baǵa jetpes jádigerlerdi saqtap jetkizgen E.Ázimbaevqa rızashylyǵyn bildirdi. Baspasóz konferentsııasyna qalamyzdyń BAQ ókilderi jáne murajaı qyzmetkerleri qatysty.
«Áziret Sultan» qoryq murajaıynyń dırektory J.Áýbákir atalǵan is-sharanyń mańyzdylyǵyna toqtala ketip, Ernur aǵamyzǵa alǵysyn bildirdi.
Osylaısha, urpaqtan-urpaqqa saqtalyp kelgen jádigerler endi mýzeı tórinen oryn aldy. Bolashaqta «Abyzdan jetken asyl syı» aktsııasy óz jalǵasyn tabady.
