SHAIQAS 2026 chempıonaty qos maqsatty tehnologııalar salasyndaǵy úzdik ınjenerlerdi anyqtaıdy
ASTANA. KAZINFORM – Qazaqstanda ushqyshsyz júıeler, jerústi robototehnıkasy, kıbertehnologııalar jáne taktıkalyq daıyndyq baǵyttaryn qamtıtyn SHAIQAS 2026 chempıonaty ótedi.
QR Qorǵanys mınıstrliginiń habarlaýynsha, bul – Qazaqstandaǵy qos maqsattaǵy tehnologııalar salasyndaǵy ulttyq akseleratsııalyq baǵdarlamanyń operatory Defence Tech Center uıymdastyratyn mańyzdy joba.
Joba Qorǵanys mınıstrligi men Ǵylym jáne joǵary bilim mınıstrliginiń strategııalyq qoldaýymen júzege asyrylady. Chempıonattyń seriktesteri qatarynda robototehnıka baǵytyn damytatyn USTEM Foundation jáne ushqyshsyz ushý júıeleri salasyndaǵy bastamalardy iske asyratyn Ashyq Aspan Foundation bar. Al ınfraqurylymdyq qoldaýdy halyqaralyq ınnovatsııalyq klaster Astana Hub qamtamasyz etedi.
– Bul – Qazaqstandaǵy qos maqsattaǵy tehnologııalar salasyndaǵy ulttyq akseleratsııalyq baǵdarlamanyń operatory Defence Tech Center uıymdastyratyn mańyzdy is-shara. Chempıonattyń maqsaty – bolashaǵy zor ınjenerlik komandalardy anyqtap, olardyń ázirlemelerin ónerkásipke engizýge qoldaý kórsetý, – delingen habarlamada.
Chempıonatqa quramynda 5-ten 15 adamǵa deıin bolatyn aralas ınjenerlik komandalar qatysa alady. Komandalar joǵary oqý oryndarynyń, ınjenerlik mektepterdiń, ónerkásiptik kásiporyndardyń jáne Qarýly kúshter bólimsheleriniń qoldaýymen qurylady.
Jarys baǵdarlamasy tórt negizgi baǵyttan turady: «Aspan», «Jer», «Kıberqaýipsizdik» jáne «Taktıkalyq fınal».
«Aspan» baǵyty boıynsha qatysýshylar ushqyshsyz ushý apparattaryna qatysty tapsyrmalardy oryndaıdy. Olardyń qatarynda bir jınaqtan 5 dıýımdik FPV-dron qurastyrý, drondarmen jyldamdyq jarysyna qatysý jáne júk tasymaldaý mindetteri bar.
«Jer» baǵyty jerústi robottandyrylǵan platformalardy qoldanýǵa negizdelgen. Qatysýshylar manekenderdi evakýatsııalaý jáne mına maketterin ornalastyrý tapsyrmalaryn oryndaıdy.
«Kıberqaýipsizdik» kezeńinde qatysýshylar arnaıy kıberpolıgon jaǵdaıynda ázirlengen ártúrli stsenarııler boıynsha synǵa túsedi.
Taktıkalyq fınalda bes ınjenerden turatyn komanda kedergiler jolaǵynda áreket etedi. Bul kezeńde qozǵalmaıtyn nysandarǵa straıkbol qarýymen atý jáne taktıkalyq medıtsına elementterin oryndaý kózdelgen.
– «Aspan» baǵyty boıynsha qatysýshylar ushqyshsyz ushý apparattaryna qatysty tapsyrmalardy oryndaıdy. Olardyń qatarynda bir jınaqtan 5 dıýımdik FPV-dron qurastyrý, drondarmen jyldamdyq jarysyna qatysý jáne júk tasymaldaý mindetteri bar. Al «Jer» baǵyty boıynsha jerústi robottandyrylǵan platformalardy paıdalana otyryp, manekenderdi evakýatsııalaý jáne mına maketterin ornalastyrý tapsyrmalary oryndalady, – dep habarlady Qorǵanys mınıstrligi.
SHAIQAS 2026 chempıonatynyń kúntizbesine sáıkes, komandalardy tirkeý 1-15 maýsym aralyǵynda defencetech.kz saıty arqyly júrgiziledi. 16-25 maýsym aralyǵynda ótinimder qaralyp, ınjenerlik qujattama negizinde fınalıst komandalar irikteledi. Fınalǵa ótken komandalardyń tizimi 1 shildede jarııalanady.
19-20 shildede fınal alańynda mindetti eki kúndik synaq kezeńi ótkiziledi. Bul ýaqytta tehnıkany tekserý jáne qysqartylǵan dalalyq synaqtar uıymdastyrylady.
Ulttyq fınal 14-15 tamyz kúnderi ótedi. Birinshi kúni kıberkezeń men 1/8 fınal oıyndary uıymdastyrylsa, ekinshi kúni shırek fınaldar, jartylaı fınaldar, fınaldyq básekeler jáne marapattaý rásimi ótedi.
Jalpy júlde qory 10 mıllıon teńgeni quraıdy.
Sonymen qatar «Áýe júıeleriniń úzdik ınjenerlik kesheni», «Jerústi júıeleriniń úzdik ınjenerlik kesheni» jáne «Kıberqaýipsizdik salasyndaǵy syılyq» arnaıy nomınatsııalary belgilengen. Júldeli oryndarǵa ıe bolǵan komandalardyń ǵylymı jetekshileri de arnaıy marapattarǵa ıe bolady.
Chempıonatqa qatysty tolyq aqparatty Defence Tech Center resmı saıtynan alýǵa bolady. Uıymdastyrýshylar úshin baılanys poshtasy – info@defencetech.kz. Defence Tech Center keńseleri Astanadaǵy ALEM AI Center men Almatydaǵy Ofıtserler úıinde ornalasqan.
Aıta keteıik, qazaqstandyq polıtseıler halyqaralyq kıberqaýipsizdik jarysynda top jardy.
