Shahtınsktegi garajdardyń birinde órt shyǵyp, jasóspirim kóz jumdy
ShAHTINSK. KAZINFORM — Qaraǵandy oblysy Shahtınsk qalasynda garajdardyń birinde bolǵan órt jasóspirimniń ómirin qıyp, taǵy eki balanyń jaraqat alýyna sebep boldy. Qaıǵyly oqıǵanyń naqty mán-jaıy anyqtalyp jatyr.
2026 jylǵy 19 mamyr kúni saǵat 20:27 shamasynda Shahtınsk qalasyndaǵy Molodejnaıa kóshesinde ornalasqan garajda órt shyqqan. Órt saldarynan shatyrdyń aǵash qurylymdary, paıdalanylǵan turmystyq zattar, sondaı-aq eki mototsıkldiń janǵysh bólshekteri tolyqtaı derlik otqa oranǵan. Órttiń jalpy aýmaǵy shamamen 20 sharshy metrdi qurady.
Órtti sóndirý barysynda qutqarýshylar 2008 jyly týǵan jasóspirimniń kúıip qalǵan denesin tapty. Sondaı-aq 2008 jáne 2009 jyly týǵan taǵy eki jasóspirim ártúrli deńgeıdegi kúıik jaraqattarymen jedel járdem brıgadasy arqyly medıtsınalyq mekemege jetkizildi.
Qaraǵandy oblysy Tótenshe jaǵdaılar departamentiniń baspasóz qyzmeti taratqan aldyn ala málimetke sáıkes, órt janarmaı quıý kezinde bolǵan. Jeńil tutanatyn suıyqtyq býlarynyń ashyq ot kózinen tutanýy saldarynan jalyn lezde tarap, garaj ishin tolyq sharpyǵan.
Atalǵan derek boıynsha Tótenshe jaǵdaılar departamenti qylmystyq is tirkep, sotqa deıingi tergeý amaldaryn júrgizip jatyr.
Buǵan deıin Astanada bes qabatty úıden órt shyǵyp, 36 adam evakýatsııalanǵany jaıly habarlaǵan bolatynbyz.
