Shahtınskidegi kenshilerdiń narazylyq aktsııasy: Kelissózder jalǵasýda
ASTANA. QazAqparat - Qaraǵandy oblysynyń Shahtınsk qalasynda narazylyq aktsııasyna qatysyp jatqan kenshilermen kelissózder jalǵasýda, dep habarlaıdy QazAqparat Qaraǵandy oblysynyń ákimdigine silteme jasap.
Eske salsaq, 11 jeltoqsan kúni «ArselorMıttal Temirtaý» AQ Kómir departamentiniń tórt shahtasynda jumyskerler toby aýysymdary aıaqtalǵan soń jer betine shyǵýdan bas tartqan bolatyn. Olardyń basty talaby - jalaqyny kóterý.
«Túnde shahta qyzmetkerleri kelissóz júrgizý úshin óz ókilderin shyǵardy. Yntaly top quramyna barlyq eńbek ujymdarynyń ókilderi, «ArselorMıttal Temirtaý» AQ basshylyǵy, shahtalardyń dırektorlary, oblystyq jáne Shahtınsk qalasy ákimdikteriniń, sondaı-aq Qaraǵandy oblystyq prokýratýrasynyń ókilderi endi.
Negizinde, kenshilerdiń alǵa qoıyp otyrǵan talaptary jańa biryńǵaı ujymdyq kelisimshartta qarastyrylyp qoıǵan bolatyn. Yntaly toppen jalaqy kólemin ulǵaıtý máselesin talqylaý talaby qoıylyp otyr», - delingen «ArselorMıttal Temirtaý» AQ-nyń 12 jeltoqsan kúni tańerteń taratqan aqparatynda.
12 jeltoqsan, keshki saǵat 20.00-degi jaǵdaı boıynsha, kenshilermen kelissózder áli de jalǵasyp jatqany habarlandy.
«Kelisim komıssııasynyń jumysy jalǵasýda. «ArselorMıttal Temirtaý» AQ ákimshiligi shahtadaǵy kenshilerdi ystyq tamaqpen, qurǵaq shulǵaýlarmen jáne shamdarmen qamtamasyz etýde. Kásiporynnyń densaýlyq saqtaý beketteri táýlik boıy jumys istep jatyr. Qajetti jaǵdaı úshin jyljymaly jansaqtaý toptary kezekshilik etýde. Kenshiler medıtsınalyq qyzmetkerlerdiń kómegine júgingen joq.
Oryn alǵan jaǵdaıǵa baılanysty kompanııa qyzmetkerleriniń qosymsha kezekshiligi júrgizilýde. Shahtanyń aýysym bastyqtary árbir eki saǵat saıyn VASS «Kómir» shtabyn jáne óz jetekshilerin aǵymdaǵy jaǵdaı týraly aqparattandyryp otyr. Aýysym bastyqtary men lampa mehanıkteri jumyskerlerdi shamdarmen jáne ózin-ózi qutqarý quraldarymen qamtamasyz etý úshin jaýapty», - delingen» kompanııanyń baspasóz málimetinde.
Jaǵdaı Qaraǵandy oblysy ákimdiginiń baqylaýyna alyndy. Buǵan deıin oblys basshylyǵy Shahtınskide kenshilerdiń otbasy múshelerimen jáne «ArselorMıttal Temirtaý» AQ ókilderimen kezdesken bolatyn. Kenshilerdiń týǵan-týystaryna qalyptasqan jaǵdaı týraly, sonymen qatar qoıylǵan barlyq saýaldar boıynsha túsinikteme berildi.
Málim etilgendeı, basqa shahtalar jumystaryn shtattyq rejimde jalǵastyryp jatyr.
