Shahtınskide joǵalǵan qyzdy tabýǵa kómektesken eriktiler marapattaldy
Qaraǵandy oblysy Shahtınsk qalalyq polıtsııa bólimine shilde aıynyń 12-nen 13-ne qaraǵan túni 34 jastaǵy azamatsha habarlasyp, óziniń 10 jastaǵy qyzynyń joǵalyp ketkeni týraly aryzdanǵan. Belgili bolǵandaı, azamatsha qyzymen tanysynyń úıinde qonaqta bolyp, sol úıde qonyp qalǵan. Oıanǵan kezde qyzynyń joq ekenin bilgen. Qala turǵyny balasyn bir táýlikke jýyq ózi izdep, taba almaǵan soń, polıtsııa bólimine habarlasqan.
Tártip saqshylary birden balany izdeýge kiristi. Balanyń joǵalǵany týraly aqparatty polıtsııa qyzmetkerleri qala turǵyndaryna habarlap, olar óz kezeginde tártip saqshylaryna joǵalǵan qyz bir áıelmen júrgenin aıtqan. 10 jastaǵy qyzdyń qasynda júrgen azamatshanyń birden mekenjaıy anyqtaldy. Alaıda ol azamatsha úıinde bolmaı shyqqan. Keıin, azamatsha men joǵalǵan qyzdyń fotosýretteri qyzdy izdeýge shyqqan Shahtınsk qalasy eriktileriniń WhatsApp chattaryna jiberildi.
Joǵalǵan qyzdy izdeýge 200 polıtsııa qyzmetkeri, Ulttyq ulannyń 100 jaýyngeri jumyldyryldy. Sonymen qatar izdeýge Shahtınsk qalasynyń eriktileri men izdeýge nıet bildirgen 650 adam qosyldy. Qyzdyń sýreti Instagram áleýmettik jelisi arqyly taratyldy. Tártip saqshylary men eriktiler qaladaǵy kópqabatty úılerdiń jertólelerin, shatyrlaryn qarap, qala syrtyndaǵy aǵash ekpeleri men sý qoımalaryn qaraý jumystary júrgizildi.
Birlesken jedel izdeý jumystarynyń nátıjesinde saǵat 18.00 shamasynda joǵalǵan qyz aman-esen tabyldy. Ony tabýda eriktiler Lıýbov Hvaşova, Jeńis Ospanov jáne Nıkıta Abdrahmanovtyń eńbegi erekshe.
«Qyz balanyń joǵalyp ketkeni týraly aqparatty izdeýge jumyldyrylǵan eriktilerdiń qurǵan chaty arqyly bildik. Sol chattyń arqasynda barlyq aqparatty bilip otyrdyq. Úıde otyrǵanymda bireý esik qaqty. Esikti ashqanymda esiktiń aldynda temeki suraǵan azamatshany kórdim. Temeki tartpaımyn dedim. Ol azamatshany eshqashan kórmesem de, ol maǵan tanys adamdaı kórindi. Bir kezde bul adamdy joǵalǵan qyzben ketken azamatsha dep chatqa salǵany esime tústi. Birden izdeýde júrgen balalarǵa habarlasyp, ol áıeldi kórgenimdi aıttym», – deıdi Lıýbov Hvaşova.
Bul aqparat Jeńis Ospanov pen Nıkıta Abdrahmanovqa túsip, olar birden polıtsııa qyzmetkerlerimen habarlanǵan mekenjaıǵa shyqqan. Olar tártip saqshylarymen birge páterdi anyqtap, joǵalǵan qyzben azamatshanyń páterin taýyp alyp, balany aman-esen alyp shyqty. Qyzdyń janynda bolǵan azamatshanyń aıtýynsha, ol aryzdanýshynyń qurbysy eken. Sol kúni ol qyzdy alyp ata-anasyna aparǵan, alaıda úıde eshkim bolmaǵandyqtan qyzdy alyp, basqa qurbysyna ketip qalǵan. Sóıtip sol jerde eki táýlikten astam ýaqyt bolǵan.
Qazirgi ýaqytta tabylǵan qyz anasyna tabystaldy. Departament bastyǵy Sanjar Ádilov eriktiler L.Hvaşova, Jeńis Ospanov jáne Nıkıta Abdrahmanovty balany tabýǵa qosqan úlesteri úshin Іshki ister mınıstrliginiń nyshany bar qol saǵatpen marapattap, atqarǵan jumystaryna alǵys bildirdi.
