Shahtınskide órtengen páterden «ArselorMıttal Temirtaý» zańgeriniń denesi tabyldy

ShAHTINSK. QazAqparat - Shahtınsk qalasyndaǵy kópqabatty úılerdiń biriniń páterinde órt sóndirý kezinde TJD qyzmetkerleri 54 jastaǵy áıeldiń denesin tapty. Ol «ArselorMıttal Temirtaý» kompanııasynyń zańgeri bolyp shyqty. Áıeldiń denesinde pyshaq jaraqaty bolǵan, dep habarlaıdy QazAqparat tilshisi.

Qaıǵyly oqıǵa 23 sáýir túski ýaqytta bolǵan. 112 qyzmetiniń dıspetcherlerine bes qabatty úıde órt shyqqany týraly habar túsken.

«23 sáýir saǵat 13:01-de Shahtınsk qalasynda Jeńiske 40 jyl kóshesi, 79-shy úıde órt shyqqany týraly habarlama kelip tústi. Bes qabatty turǵyn úıdiń 5-qabatyndaǵy páterde jalpy aýdany 6 sharshy metr aýmaqta jıhaz ben úı zattary órtendi. Órt ornynan 1969 jyly týǵan áıeldiń denesi tabyldy. TJ departamentiniń kúshimen kireberistegi páterlerden 9 adam evakýatsııalandy. Órt 13:25-te oqshaýlanyp, 13:31-de tolyq sóndirildi. Oqıǵanyń mán-jaıy men órttiń sebebi anyqtalyp jatyr», - dep habarlady Qaraǵandy TJD baspasóz qyzmeti.

Belgili bolǵandaı, qaıtys bolǵan adamnyń denesinen pyshaq jaraqatynyń izi tabylǵan. Polıtsııa «kisi óltirý» baby boıynsha is qozǵady.

«Atalǵan fakti boıynsha QR QK 99-baby 1-bóligi boıynsha qylmystyq is tirkeldi. Qazirgi ýaqytta kináli adamdy jáne bolǵan oqıǵanyń mán-jaıyn anyqtaý boıynsha jedel-izdestirý is-sharalary júrgizilip jatyr. Qajetti saraptamalar taǵaıyndaldy»,-dep túsindirdi Qaraǵandy oblysy PD baspasóz qyzmeti.