Shahtınskide oqýshylardy «aqymaq maımyl» dep ataǵan dırektordyń orynbasaryna sógis jarııalandy
Shahtınsk qalasynyń bilim berý bóliminde habarlaǵandaı, ádepsiz sózder aıtqan pedagog bilim berý júıesinde 21 jyl ótili bar, sońǵy úsh jyl № 6 mektepte isteıdi. Ol 8V synyp oqýshylaryna til tıgizgen. Oqıǵa bıologııa sabaǵynda tańǵy sabaq kezinde bolǵan. Dóreki sózderi bar aýdıojazba Shahtınsk qalasy ákimdiginiń Telegram arnasyna jarııalandy, Shahtınsk qalasynyń bilim bóliminiń Call-ortalyǵyna berildi jáne áleýmettik jelide tarady.
«Atalǵan fakti boıynsha «Shahtınsk qalasynyń bilim bólimi» MM qyzmettik tergeý júrgizildi, №6 jalpy bilim beretin mekteptiń basshysy N.Onsovıch, qala pedagogteriniń kásipodaq tóraǵasy, qalanyń qurmetti turǵyny, táýelsiz sarapshy, mektep dırektory, synyp jetekshisi, mekteptiń pedagogıkalyq keńesi músheleriniń qatysýymen Pedagogıkalyq ádep jónindegi keńestiń shuǵyl otyrysy ótkizildi. Keńes otyrysynda muǵalim etıkalyq minez-qulyq jáne «Pedagog mártebesi týraly» zańdy buzǵanyn aıtyp, kinásin moıyndady. Otyrys barysynda osy jaǵdaıdyń barlyq mán-jaılary qaraldy, onyń qorytyndysy boıynsha qyzmetkerdiń tártiptik teris qylyq jasaǵany úshin QR Eńbek kodeksiniń 64-baby 1-tarmaǵy, 3-tarmaǵy boıynsha qatań sógis túrinde osy pedagogke tártiptik jaza qoldaný týraly sheshim qabyldandy», - dep habarlady Shahtınsk qalasynyń bilim berý bóliminen.
Sondaı-aq, vedomstvonyń málimdeýinshe, jaǵdaıdy retteý maqsatynda mektep ákimshiligi 2021 jylǵy 10 qyrkúıekte pedagogıka jáne ata-analar qoǵamdastyǵy, pedagogıka etıkasy jónindegi keńes músheleriniń qatysýymen keńeıtilgen ata-analar jınalysyn ótkizedi, onda muǵalim osy oqıǵanyń sebepterin baıandaıdy jáne ádepsiz minez-qulqy úshin keshirim suraıdy.
Pedagogıka ádep normalaryn saqtaý jáne osyndaı jaǵdaılardyń aldyn alý maqsatynda Shahtınsk qalasynyń barlyq jalpy bilim beretin mektepterinde pedagogıka ádebi qaǵıdalaryn saqtaý týraly máseleni qarastyratyn pedagogıka keńesteriniń kezekti otyrysy ótkiziledi.