Shahtınskide kenshilerdiń qaza tabý oqıǵasyna baılanysty memkomıssııa quryldy
QARAǴANDY. QAZAQPARAT - «ArselorMıttal Temirtaý» AQ-nyń «Qazaqstanskaıa» shahtasynda metan gazynan ýlanǵan úsh kenshiniń qazasyn tergeý maqsatynda qurylǵan memlekettik komıssııanyń quramyna úsh qurylym kirgizildi, dep habarlady beredi «QazAqparat» HAA tilshisi.
Metan gazynyń kenet taralýynyń sebebin anyqtaý jáne jumys júrip jatqan qyrtystarda gaz bolýy múmkin ekendigi týraly boljamnyń jasalmaýyna jaýapty laýazymdy tulǵalardy aıqyndaý jumystaryn Investıtsııalar jáne damý mınıstrliginiń Indýstrıaldyq damý jáne ónerkásiptik qaýipsizdik komıtetiniń, sondaı-aq Eńbekti qorǵaý basqarmasynyń qyzmetkerleri, óndiris jáne ındýstrıaldy-ınnovatsııalyq damý basqarmasynyń mamandary júrgizedi.
«Bizdiń mamandar komıssııa quramynda ekendigi týraly habarlama aldyq. Qazir shahtada jumys toqtatylǵan, avarııalyq kenjardyń gazdan tazartylýyn kútemiz. Óz quzyretimiz sheńberinde shahta jaıly búkil málimetterdi jınap jatyrmyz», - deıdi óndiris jáne ındýstrıaldy-ınnovatsııalyq damý basqarmasyndaǵylar.
Memlekettik komıssııanyń tergeý nátıjeleri onyń qyzmeti aıaqtalǵannan keıin anyq bolady. Zańdylyqqa sáıkes, komıssııa kenetten metan gazynyń taralýynyń mán-jaıyn 10 kún boıy tekseredi. Komıssııa qorytyndylary aldaǵy ýaqytta ishki ister organdarynyń tergeýshilerine Qylmystyq Kodekstiń 156-babynyń «abaısyzda eki nemese odan da kóp adamnyń ólimine ákep soqqan is-áreket» dep atalatyn 4-bóligine sáıkes qylmystyq isti odan ári tergeý amaldaryn júrgizý úshin beriledi.
Gaz shahtanyń batys jeldetkish uńǵysynda 614 metr tereńdikte taralǵany anyqtaldy.
Eske sala keteıik, polıtsııa «ArselorMıttal Temirtaý» AQ kómir departamentiniń «Qazaqstanskaıa» shahtasynda eńbekti qorǵaý qaǵıdalaryn buzý faktisi boıynsha qylmystyq isti tergeýde. Tergeý amaldary Qylmystyq Kodekstiń 156-babynyń «Abaısyzda eki nemese odan da kóp adamnyń ólimine ákep soqqan is-áreket» dep atalatyn 4-bóligine sáıkes júrgizilýde. Іs qandaı da bir tulǵaǵa qatysty emes, toptyq qaıǵyly oqıǵa faktisi boıynsha tergelip jatyr.
Kompanııadaǵylar qaıǵyly oqıǵa týraly keńirek aıtyp berdi. «332 D6-1-3 jeldetkish uńǵysyndaǵy metandy baqylaý qurylǵysynan keletin aqparat kenet joǵalǵan. Avtomattanǵan gazdan qorǵanys júıesiniń operatory málimettiń kenet joǵalǵany jáne shahtanyń batys jeldetkish uńǵysynda metan deńgeıiniń artyp jatqany týraly taý dıspetcherine jyldam habarlaıdy. Shahta basshylyǵy tez arada jaǵdaıdy anyqtaý sharalaryn júrgizgen: kenjarǵa Áskerılendirilgen apattyq qutqarý qyzmetiniń eki bólimshesi men sol ýchaskeniń taý sheberin jibergen. Shamamen tańǵy saǵat altyda sol uńǵydan es-tússiz jatqan úsh jumysshy tabylǵan», - delinedi «AMT» kompanııasynyń baspasóz qyzmetiniń baıandamasynda.
Toptyq qaıǵyly oqıǵanyń aldyn ala sebebi retinde metannyń kenet taralýy, ıaǵnı gazodınamıkalyq qubylys atalýda.
«Oqıǵa kezinde shahtada 132 adam bolǵan, sonyń 129-y apatty joıý josparyna sáıkes ózderi jerdiń betine shyqqan. Áskerılendirilgen apattyq qutqarý qyzmetiniń 49 qyzmetkeri men 9 tehnıka apatty joıý jumystaryn júrgizýge tartyldy. Kompanııa basshylyǵy men qyzmetkerleri qaza bolǵandardyń otbasy men týystaryna qaıǵysyna ortaqtasa kóńil aıtady. Qaza tapqandardyń otbasyna tolyq kólemde kómek kórsetiledi. Jerleý rásiminiń barlyq shyǵyndaryn kompanııa óz moınyna alady», - dep habarlaıdy kompanııa baspasóz qyzmeti.
Eske salaıyq, 31 tamyz, tańǵy saǵat 4-te «ArselorMıttal Temirtaý» AQ kompanııasynyń Shahtınsk qalasyndaǵy «Qazaqstan» shahtasynyń uńǵysynda kenet metan taraǵan. Túngi aýysymdaǵy 136 adam shuǵyl túrde jer betine shyqqan. Apat ýchaskesinde tórt shahter jumys istep jatqan. Úsheýiniń denesi tabylǵan, tórtinshi jumysshyny QR IDM Indýstrıaldyq damý jáne ónerkásiptik qaýipsizdik komıtetiniń «ÁAQQ «Kómir» áskerılendirilgen apattyq qutqarý qyzmeti izdestirýde.
