Shahtınskide fın tehnologııasy boıynsha jańa balabaqsha salynady
ASTANA. QazAqparat - Shahtınskide balabaqshaǵa kezekti tolyǵymen joıý josparlanyp otyr. Ol úshin kelesi jyly munda 320 orynǵa shaqtalǵan fın tehnologııasy boıynsha balabaqsha salynady, dep habarlaıdy QazAqparat Qaraǵandy ákimdiginiń resmı saıtyna silteme jasap.
Bul týraly Shahtınsk qalasynyń bilim bóliminiń jetekshisi Nıkolaı Onsovıch Qaraǵandy oblysynyń ákimi Erlan Qoshanovqa jumys sapary barysynda málimdedi.
«Bizdiń qalamyzda segiz balabaqsha jumys isteıdi. Olardyń árqaısysynda 1-3 jas aralyǵyndaǵy búldirshinderge arnalǵan damytý toptary bar. Sondaı-aq, jekemenshik «Kapýsta» sábıler balabaqshasy jumys isteıdi. Bir jastan úsh jasqa deıingi 300 bala kezekte tur. Biz ony kelesi jyly jabamyz. 320 oryndyq balabaqsha salýǵa daıyn ınvestor tabyldy», - dedi ol. 
Jańa ǵımarat qabyrǵalyq panelderden fın tehnologııasy boıynsha salynady. Sonyń arqasynda balabaqsha jarty jylda salynyp bitýi tıis. Mekeme memlekettik-jekemenshik áriptestik baǵdarlamasy boıynsha jumys isteıtin bolady. Jergilikti bıýdjetten ár balaǵa 26 000 teńge bólinedi, ata-analar bolsa aıyna 11 myń teńge tóleıdi. Mundaı áriptestik qurý úshin barlyq qujattar daıyndalyp qoıǵan.
«Biz MJÁ baǵdarlamasy boıynsha jumystyń bastalýyn kútip otyrmyz. Ázirge ata-analar úshin tólemaqy qymbat - kúnine 1300 teńge. Biraq balalar kishkentaı bolǵandyqtan, olar beıimdelý kezinde óte jıi aýyrady. Sondyqtan aıyna 30 000 teńgeniń ornyna biz bir baladan 13-15 myń teńge alamyz. Ázirge bizdiń sábıler balabaqshasy «mınýsqa» ótip ketti deýge bolady», - dedi «Kapýsta» sábıler balabaqshasynyń dırektory Elızaveta Ýmantseva. 
Shahtınsk oblys boıynsha 1-3 jas aralyǵyndaǵy sábıler úshin balabaqsha kezegi bolmaıtyn alǵashqy qala bolady.
Eske sala keteıik, 2017 jyldan bastap memlekettik-jekemenshik áriptestik baǵdarlamasynyń arqasynda balabaqshalarǵa balalardy 1 jastan 6 jasqa deıin berýge bolatyn ereje rásimdeldi. Bul baǵdarlama boıynsha jergilikti atqarýshy organdar mektepke deıingi mekemelerde aıyna bir balaǵa 26 000 teńgeni quraıtyn memlekettik tapsyrys ornalastyrady. Al, ata-analar aıyna tek 11 000 teńge tóleıdi.
