Shahtınskide erekshe qajettilikteri bar balalarǵa arnalǵan ortalyq ashyldy

ShAHTINSK. QazAqparat – Shahtınsk qalasynda №6 oblystyq psıhologııalyq-medıtsınalyq-pedagogıkalyq keńes (PMPK) ashyldy. Onda Shahtınsk, Saran, Abaı jáne Nura aýdandarynan týǵannan bastap 18 jasqa deıingi erekshe bilim berý qajettilikteri bar 50 myńnan astam balaǵa qyzmet kórsetiledi, dep habarlaıdy QazAqparat tilshisi.

Jańa PMPK №3 jalpy bilim beretin mektepte ornalasqan. Ortalyqta jylyna 800-ge jýyq balaǵa qajetti kómek pen keńes ala alady. Bul oblystaǵy jumys istep turǵan PMPK-ge balalardyń kezegin eki ese azaıtýǵa múmkindik beredi.

«Erekshe qajettilikteri bar balalarǵa bilim berý máselesi basty nazarda. Oblysta balalardyń ómir súrý sapasyn jaqsartý úshin arnaıy ınklıýzıvti bilim berý ınfraqurylymy damyp keledi. PMPK jelilerin keńeıtý – baǵyttardyń biri», - deıdi № 6 Qaraǵandy oblystyq PMPK basshysy Aqmaral Muqasheva.

PMPK-da kedergisiz orta quryldy, pandýstar bar, tabaldyryqtar joq, taktıldi joldar, tutqalar ornatylǵan, mamandar shtaty jasaqtalǵan.

Kabınetterde balalardy tekserý jáne keńes berý úshin barlyq qajetti jabdyqtar men dıagnostıkalyq ádister qarastyrylǵan.

Shahtınsk turǵyny Qasıet Bashkenova jańa PMPK-ǵa alǵashqylardyń biri bolyp qosyldy. Ol óziniń alty jasar qyzy Aıymdy osynda ákeledi. Buryn kelinshek balasyn Qaraǵandyǵa tasýǵa májbúr bolatyn.

«Buryn biz Qaraǵandyǵa sapar shegýge kóp ýaqyt jumsaıtynbyz, avtobýstan avtobýsqa otyrýdyń ózi de biraz ýaqytty alatyn. Odan qalsa kezegimizdi uzaq kútýge týra keletin. Al munda barlyǵy jaqyn, bilikti kómek ala alamyz. PMPK mamandaryna bara bastaǵannan beri qyzym ashyldy, onyń este saqtaý qabileti jaqsardy. Aptasyna eki ret logoped, defektolog jáne psıhologpen bir saǵat aınalysamyz. Nátıjeler qýantady», - deıdi Qasıet Bashkenova.

Balany PMPK-ǵa tekserýge jazý úshin ilespe qujattardy qosa usyna otyryp, elektrondyq nemese qaǵaz túrinde ótinish berý qajet. Sonymen qatar, týý týraly kýáliktiń, múgedektik týraly qorytyndynyń (bar bolsa), dárigerlik-konsýltatsııalyq komıssııanyń densaýlyq jaǵdaıy boıynsha úıde oqytý qajettiligi týraly (úıde oqıtyn balalar úshin) skanerlengen kóshirmelerin usyný kereý.

Balany konsýltatsııaǵa tirkeý úshin №6 PMPK keńsesine habarlasýǵa nemese jeke kabınette tirkelý arqyly jazylýǵa bolady.

Oblystaǵy PMPK-niń birine balasyn kezekke qoıǵan Shahtınsk, Saran, Abaı jáne Nura aýdandarynyń turǵyndary №6 psıhologııalyq-medıtsınalyq-pedagogıkalyq konsýltatsııasyna qaıta tirkele alady.