Shahtınskide turǵyndardy qutqaryp qalǵan bes polıtseı marapattaldy
ASTANA. KAZINFORM — Shahtınsk qalasynda gaz ballony jarylǵan sátte turǵyndardy qutqarý barysynda erlik tanytyp, ózderi jaraqat alǵan bes polıtsııa qyzmetkeri Qazaqstan Prezıdentiniń Jarlyǵymen «Erligi úshin» medalimen marapattaldy. Bul týraly ІІM baspasóz qyzmeti habarlady.
Búgin qalalyq aýrýhanada em qabyldap jatqan tártip saqshylaryn arnaıy quttyqtaý úshin Qazaqstan Іshki ister mınıstriniń tapsyrmasymen ІІM jeke qurammen jumys isteý departamentiniń bastyǵy Oljas Myrzabekov Qaraǵandy oblysyna arnaıy bardy.
Mınıstrlik ókili Qaraǵandy oblysy Polıtsııa departamentiniń bastyǵy Negmet Ismagýlovpen birge Shahtınsk qalalyq aýrýhanasyna baryp, qyzmettik boryshyn óteý kezinde jaraqat alǵan polıtseılermen kezdesti.
Kezdesý barysynda Oljas Myrzabekov Memleket basshysy men Іshki ister mınıstrliginiń atynan alǵys bildirip, kórsetilgen erliktiń joǵary baǵalanǵanyn atap ótti.
– Sizderdiń oqıǵa kezindegi janqııarlyq áreketterińiz, adam ómirin saqtap qalýdaǵy batyl qadamdaryńyz jáne qyzmetke degen adaldyqtaryńyz Memleket basshysy tarapynan joǵary baǵalandy. Bul – úlken erlik pen kásibıliktiń kórinisi. Osyndaı qaısarlyqtaryńyz keıingi jas býynǵa úlgi bolady. Emderińizdi tolyq aıaqtap, qaıtadan sapqa qosylyp, el tynyshtyǵy jolynda abyroıly qyzmetterińizdi jalǵastyrady dep senemiz, – dedi Oljas Myrzabekov.
Іs-shara barysynda Prezıdent Jarlyǵynan úzindi oqylyp, erlik kórsetken qyzmetkerler – Rýslan Tazıev, Ashat Berdibekov, Nurgeldi Quljabekov, Ernaz Óskenbaı jáne Dýlat Sıtahmetovke «Erligi úshin» medali tabystaldy. Marapat ıeleri kórsetilgen qurmet úshin Memleket basshysyna jáne Іshki ister mınıstrligine rızashylyq bildirdi.
– Biz úshin eń bastysy adamdardyń ómirin aman alyp qalý boldy. Sol sátte ýaqytpen de, qaýippen de sanasqan joqpyz. Bul – árbir polıtsııa qyzmetkeriniń azamattyq ári kásibı paryzy. Kórsetilgen senim bizge úlken jaýapkershilik júkteıdi. Aldaǵy ýaqytta da el ıgiligi úshin adal qyzmet etýge daıynmyn, – dedi patrýldik polıtsııa vzvodynyń ınspektory Ernaz Óskenbaı.
Al polıtsııa qyzmetkeri Dýlat Sıtahmetov bul marapattyń onyń qyzmetine jańa serpin bergenin aıtty.
– Berilgen marapat maǵan zor jiger syılady. Bul – tek qurmet qana emes, sonymen birge úlken jaýapkershilik. Halyq senimin aqtaý – bizdiń basty mindetimiz, – dedi ol.
Eske sala keteıik, 23 naýryz kúni Shahtınsk qalasyndaǵy kópqabatty úılerdiń birinde gaz ballony jarylyp, artynsha órt shyqqan edi. Oqıǵa ornyna alǵashqylardyń biri bolyp jetken polıtsııa qyzmetkerleri turǵyndardy jedel evakýatsııalap, adam ómirin qutqarý kezinde túrli jaraqat aldy.
