Shahtınskidegi gaz jarylysy: qylmystyq is qozǵalyp, kúdikti ustaldy
QARAǴANDY. KAZINFORM – Shahtınsk qalasyndaǵy turǵyn úıde bolǵan gaz-aýa qospasynyń jarylysyna qatysty jańa derekter belgili boldy. Polıtsııa qylmystyq is qozǵap, 40 jastaǵy kúdiktini ustady.
Eske sala ketsek, oqys oqıǵa Qaraǵandy oblysynyń Shahtınsk qalasynda bolǵan. Kópqabatty turǵyn úılerdiń birinde turmystyq gaz ballonynyń jarylyp, artynsha páterdegi jıhaz ben turmystyq zattar otqa oranǵan. Oqıǵa ornyna 4 mınýtta jetken órt sóndirýshiler jedel túrde evakýatsııa sharalaryn uıymdastyryp, joǵarǵy qabattardan baspaldaq arqyly bes adamdy shyǵarǵan.
– Órt sóndirýshiler kelgenge deıin turǵyndardyń bir bóligin polıtsııa qyzmetkerleri evakýatsııalady, qalǵandary ǵımarattan ózdiginen shyqty. Turǵyndar úshin jylytý pýnkti uıymdastyrylyp, TJM vahtalyq avtokóligi arqyly jyly ornalastyrý qamtamasyz etildi, – dep habarlady Qaraǵandy oblysy TJD baspasóz qyzmeti.
Oqıǵa saldarynan segiz adam zardap shekti, onyń beseýi – polıtsııa qyzmetkerleri. Olardyń barlyǵy medıtsınalyq mekemelerge jetkizildi.
40 sharshy metr aýmaqty sharpyǵan órt tolyq sóndirildi. Oqıǵa ornynda TJD basshysynyń jetekshiligimen órt sóndirý shtaby quryldy. Oqıǵanyń sebepteri men mán-jaıy anyqtalyp jatyr.
– Bótenniń múlkin qasaqana joıýǵa ákep soqqan órt faktisi boıynsha qylmystyq is qozǵaldy. Polıtsııa qyzmetkerleri 40 jastaǵy kúdiktini ustady. Qazirgi ýaqytta ol Shahtınsk qalalyq aýrýhanasynyń arnaıy palatasyna jatqyzylyp, kúzetpen ustalyp otyr. Saýyǵyp shyqqannan keıin ol ýaqytsha ustaý ızolıatoryna qamalady, – dep habarlady Qaraǵandy oblysy PD baspasóz qyzmeti.
Tergeý júrgizilip jatyr.
Eske salaıyq, Aqmola oblysy Býrabaı aýdanynyń Şýchınsk qalasynda bes qabatty turǵyn úıge japsarlas ornalasqan bir qabatty kafede gaz-aýa qospasynyń jarylysy bolyp, artynan órt shyqqan. Sonyń saldarynan alty adam qaza tapqan. Keıinirek qurbandar sany 11 adamǵa deıin ósti.