Shahtınsk jáne Saran qalalarynda sý tasqyny qaýpi joǵary ýchaskeler tekserildi

QARAǴANDY. QazAqparat – Qaraǵandy oblysynda sý tasqynyna daıyndyq jalǵasýda. Óńir ákiminiń orynbasary Ermek Alpysov jáne TJ departamentiniń bastyǵy Murat Qatpanov Saran jáne Shahtınsk qalalarynyń sý tasqyny qaýpi joǵary ýchaskelerin aralady, dep habarlaıdy QazAqparat tilshisi.

Onyń barysynda retteýishterdiń shlıýzderi jáne Saran sý qoımasynyń aınalma arnalarynyń jumys qabileti tekserildi. Qar tazalaý jáne sý ótkizý qubyrlary men kanal tazalaý jumysy baǵalandy.

Saran qalasynda drenaj naýalaryn montajdaý jáne jabyq úlgidegi nóser kárizin jóndeý boıynsha júzege asyrylǵan is-sharalar qaraldy.

2020 jyldyń jazǵy-kúzgi kezeńinde 500 metr drenajdyq lotokqa montajdaý júrgizildi, «Saran-Qaraǵandy» jergilikti mańyzy bar avtojolynyń ýchaskesine sý ótkizý qubyry ornatyldy.

Sondaı-aq, jalpy uzyndyǵy 11,6 shaqyrymnan asatyn sý burý arnalary tereńdetilip, tazartyldy.

Sondaı-aq, Shahtınsk aýmaǵyndaǵy Saran-Shahan avtojolynyń sý ótkizý qabileti ulǵaıdy.

Aralaý qorytyndysy boıynsha jergilikti atqarýshy organdarǵa qar shyǵarý, sý ótkizý qubyrlaryn tazartý, materıaldyq-tehnıkalyq quraldardyń qajetti qoryn daıyndaý jáne sý tasqyny kezeńine daıyndyq boıynsha halyqpen úgit-nasıhat jumysyn júrgizý, jumysty odan ári kúsheıtý tapsyryldy.

Sý tasqyny kezeńine daıyndyq turaqty baqylaýda.

Esterińizge sala keteıik, 2015-2020 jyldar aralyǵynda oblysta barlyǵy 220 shaqyrym qorǵanys bógeti men bilik turǵyzylyp, nyǵaıtyldy.

173 eldi mekende 76 shaqyrym ózen arnalarynda jaǵalaýdy nyǵaıtý, túbin tereńdetý, túzetý jáne keńeıtý jumysy jasaldy.