Shahtınsk turǵyny jalǵan PTR test úshin jaýapkershilikke tartyldy
QARAǴANDY. QazAqparat – Qaraǵandy oblysynda jalǵan PTR testini qoldanǵany úshin jas jigit qylmystyq jaýapkershilikke tartyldy. Sot oǵan 20 AEK deıin aıyppul taǵaıyndady, dep habarlaıdy QazAqparat tilshisi.
Pandemııa bastalǵannan beri Qaraǵandy oblysynyń Abaı aýdandyq Polıtsııa basqarmasy COVID-19-dyń jalǵan PTR testin alǵash ret anyqtaldy.
«Shahtınsk qalasynyń 24 jastaǵy turǵyny túzeý mekemeleriniń birinde jazasyn ótep jatqan dosymen qysqa merzimdi kezdesýge barýǵa tyrysty. Bul rette ol COVID-19 teris nátıjesi kórsetilgen zertteý qorytyndysyn usyndy. QAJ qyzmetkerleri osy qujattyń túpnusqa ekenine kúmán keltirip, ony shyǵarǵan medıtsınalyq mekemege habarlasqan. Dárigerler jas jigittiń olarǵa júginbegenin jáne eshqandaı zertteý júrgizbegenin habarlady«, - dep málimdedi Qaraǵandy oblysynyń PD.
Abaı aýdandyq PB-da Qylmystyq kodekstiń 385-baby «Jalǵan qujattardy, mórtabandardy, mórlerdi, blankilerdi, poshta tóleminiń memlekettik belgilerin, memlekettik nagradalardy qoldan jasaý, daıyndaý nemese ótkizý» boıynsha qylmystyq is qozǵaldy.
Sotqa deıingi tergeý barysynda quqyq buzýshy jalǵan qujat daıyndaǵanyn moıyndady. Qylmystyq is Abaı aýdandyq sotynyń qaraýyna berildi. Sot jigitke 20 aılyq eseptik kórsetkish – shamamen 60 myń teńge mólsherinde aıyppul taǵaıyndady. Polıtseıler ádeıi jalǵan qujat qoldanǵany úshin kinálige qylmystyq jaýapkershilik tónip turǵanyn eskertedi. Qylmystyq kodekstiń tıisti baby osy is-áreket úshin 160 aılyq eseptik kórsetkishke deıin aıyppul túrindegi jazany ne 160 saǵatqa deıingi merzimge túzeý nemese qoǵamdyq jumystardy ne 40 táýlikke deıingi merzimge qamaýǵa alýdy kózdeıdi.
