«Shahtınsk» shahtasynda bir jumysker taý-ken úıindisiniń astynda qalyp qoıdy

QARAǴANDY. QazAqparat – «Shahtınsk» shahtasynda tótenshe jaǵdaı oryn aldy. Burǵylaý jumystaryn júrgizý kezinde bir jumysshy taý-ken úıindisiniń astynda qalyp qoıdy. Zardap shekken kenshi aýrýhanaǵa jetkizildi, dep habarlaıdy QazAqparat tilshisi.

Oqıǵa búgin tańerteń «Shahtınsk» shahtasynda oryn aldy. 34 jastaǵy jumysshy burǵylaý jumystaryn júrgizý kezinde taý massasynyń astynda qalyp qoıǵan.

«6 tamyzda «Shahtınsk» shahtasynda zákirdi burǵylaý kezinde kenjardyń joǵarǵy bóliginen taý-ken massasynyń shoǵyry opyrylyp, qulaǵan. Saldarynan úńgýshi jaraqat aldy», - dep habarlady «ArselorMıttal Temirtaý» AQ baspasóz qyzmeti.

ÝPR-1 ýchaskesiniń qyzmetkerleri úńgýshige alǵashqy medıtsınalyq kómek kórsetip, birden ony shahtanyń betine shyǵarǵan. Sodan keıin reanımatsııalyq-shokqa qarsy top brıgadasy zardap shekken kenshini Qaraǵandy qalasyndaǵy H. Maqajanov atyndaǵy klınıkaǵa jetkizdi.

«Naýqas tós súıeginiń synýymen kelip tústi. Dárigerlerdiń baqylaýynda, jaǵdaıy turaqty. Barlyq qajetti medıtsınalyq kómek kórsetilýde», - dep habarlady Qaraǵandy oblysynyń Densaýlyq saqtaý basqarmasy.

Qazirgi ýaqytta is tergelýde, dep tolyqtyrdy «ArselorMıttal Temirtaý» AQ.