Shahtınsk mańynda 50 jolaýshysy bar avtobýs jol apatyna ushyrady

QARAǴANDY. KAZINFORM — Qaraǵandy oblysynda qolaısyz aýa raıyna baılanysty jol-kólik oqıǵalarynyń qaýpi saqtalyp otyr. Solardyń biri Shahtınsk qalasynan shyǵar jolda tirkeldi.

12 qańtar kúni jolaýshylar avtobýsy Shahtınsk qalasynan shyǵa beriste boran men kóktaıǵaq saldarynan jol apatyna ushyrady. Qarly boran men taıǵaq jolda júrgizýshi kólikti ıgere almaı, avtobýs joldyń jıegine shyǵyp ketken. 

Oqıǵa kezinde kólik salonynda shamamen 50 jolaýshy bolǵan. Qaraǵandy oblysy polıtsııa departamentiniń habarlaýynsha, jol-kólik oqıǵasy saldarynan qaza tapqandar men jaraqat alǵandar joq.

Polıtsııa ókilderi óńir aýmaǵynda aýa raıynyń áli de qolaısyz ekenin eskertedi. Boran, ekpindi jel jáne kóktaıǵaq respýblıkalyq jáne oblystyq mańyzy bar joldarda, sondaı-aq eldi mekenderge jaqyn aýmaqtarda qozǵalysty qıyndatyp otyr.

Osyǵan baılanysty júrgizýshilerge jyldamdyq rejımin saqtaý, qaýipsiz araqashyqtyqty ustaný, kúrt burylýdan bas tartý jáne alys saparlardy múmkindiginshe keıinge qaldyrý usynylady. Vedomstvo atap ótkendeı, joldaǵy qaýipsizdik árbir qozǵalysqa qatysýshynyń jaýapkershiligine tikeleı baılanysty.

Aıta keteıik, buǵan deıin Almaty mańyndaǵy tasjolda bolǵan jol-kólik oqıǵasynda Úndistannan kelgen stýdentterdiń qaza tapqany habarlanǵan bolatyn.