Shahtınsk qalasynyń 30 turǵynyna páter kilti berildi
QARAǴANDY. QazAqparat - Memlekettik turǵyn úı qorynan kezekte turǵandarǵa 30 páter tapsyryldy. Qonys toıyn jetim balalar, bıýdjettik uıymdardyń qyzmetkerleri jáne áleýmettik jaǵdaıy osal otbasylar atap ótti, dep habarlaıdy QazAqparat tilshisi.
Páterler qalpyna keltirilgen úıde ornalasqan. Onyń bir bóligi osy jyldyń kókteminde qaıta jóndeýden ótti. Bul úıde vedomstvolyq páterler alǵan dárigerler turyp jatyr. Al halyqtyń áleýmettik osal toptarynyń ókilderi úshin atalmysh turǵyn úı jalǵa beriletin bolady.
«Bul turǵyn úıge muqtaj otbasylar úshin aıtarlyqtaı kómek. Meniń oıymsha, bizdiń óńirdegi abattandyrý men qurylys qarqyny jyl saıyn artyp keledi. Bul jumystyń negizgi ustanymynyń biri barlyq azamattar úshin turǵyn úıdiń qoljetimdiligin arttyrý bolyp tabylady», - dedi Shahtınsk qalasynyń ákimi Serjan Aımaqov.
Jańa qonystanýshylardyń kópshiligi buryn baspana jaldaýǵa nemese týystary men dostarynan úılerinde turýǵa májbúr bolǵan.
«Men kezekte 2010 jyldan bastap turdym, osyǵan deıin týystarymnyń úıinde turdym. Men páter alǵanymdy estigenimde qýanyshymda shek bolmady. Óz baspanańnyń tabaldyryǵyn attaǵannan artyq esh baqyt joq dep sanaımyn», – deıdi Shynǵys Malgeldıev.
2020 jyly oblys ákimi Jeńis Qasymbektiń tapsyrmasy boıynsha óńirdegi qurylys kólemin 1,5 esege ulǵaıtýy tıis. Bul kezekti qysqartýǵa jáne jaqyn aradaǵy birneshe jylda halyqtyń áleýmettik osal toptarynyń barlyq ókilderin turǵyn úımen qamtamasyz etýge múmkindik beredi.
